जळगाव (प्रतिनिधी) फोन पे कंपनीतून बोलत असल्याचे भासवून एका तरुणाची ऑनलाईन ९२ हजार ९१९ रुपयात फसवणूक केल्याची घटना समोर आली आहे. याप्रकरणी तालुका पोलीस ठाण्यात गुन्हा दाखल करण्यात आला आहे.
यासंदर्भात अधिक असे की, मोहन गुंजाळ हे निमखेडी शिवारातील रहिवासी असून, त्यांचे हाय वे दर्शन कॉलनीत दूध विक्रीचे बूथ आहे. २७ सप्टेंबर रोजी सकाळी ते बूथवर असताना एका अनोळखी मोबाइल क्रमांकावरून त्यांना फोन आला. आपण फोन पे कंपनीत बोलत असल्याचे संबंधित व्यक्तीने सांगून तुमचे शेवटचे ट्रान्झेक्शन किती रुपयांचे होते, त्याबाबत गुंजाळ यांना विचारणा केली. त्यावर त्यांनी दोन हजार रुपयांचे होते, असे सांगितले. नंतर त्या व्यक्तीने तुमचे दोन हजारपैकी एक हजार फोन पे कंपनीकडे अडकलेले आहेत. मी ते टाकून देतो, त्यासाठी लिंक पाठवितो. त्यावर आलेला ओटीपी क्रमांक मला सांगावा, असे त्याने सांगितले. गुंजाळ यांनी विश्वास ठेवून आलेला ओटीपी संबंधित व्यक्तीला सांगितला. काही वेळानंतर गुंजाळ यांना त्यांच्या खात्यातील ९२ हजार ९१९ रुपये कुणाच्या तरी बँक खात्यात वर्ग झाल्याचे दिसून आले.
त्यांनी लागलीच बँकेत जाऊन खात्री केल्यानंतर त्यांच्या बँक खात्यातून ९२ हजार ९१९ रुपयांची रक्कम कुणीतरी काढून घेतल्याचे आढळून आले. त्यानंतर ओटीपी विचारून आपली फसवणूक झाल्याचे लक्षात येताच, गुरुवारी मोहन गुंजाळ यांनी तालुका पोलीस ठाणे गाठून तक्रार दाखल केली. त्यानुसार गुन्हा दाखल करण्यात आला आहे.
