जळगाव (प्रतिनिधी) येथील काव्यरत्नावली चौकात जुन्या वादातून एका जणाने लाकडी दांडक्याने एका प्रौढाला मारहाण केल्याची घटना घडली होती. याप्रकरणी आता रामानंदनगर पोलिसात त्या व्यक्तीविरुद्ध गुन्हा दाखल करण्यात आला आहे.
यासंदर्भात अधिक असे की, अमळनेर येथे मंगला देवी चौक येथे राजूसिंग परदेशी (वय ५५ रा. अमळनेर) हे वास्तव्यास आहेत. परदेशी व नरेंद्र रामादासे यांच्यात जुना वाद असून यातून परदेशी यांनी रामादासे याच्याविरोधात केस केली आहे. केस केल्याच्या रागातून नरेंद्र रामादासे याने परदेशी १७ सप्टेंबर रोजी जळगावात आले असतांना, काव्यरत्नावली चौकात परदेशी यांना शिवीगाळ करत चापटा बुक्क्यांनी तसेच लाकडी दांडक्याने मारहाण केली. मारहाणीत परदेशी यांच्या उजव्या हाताचे हाड फ्रक्चर झाले. उपचारानंतर रविवार, १० ऑक्टोंबर रोजी राजूसिंग परदेशी यांनी रामानंदनगर पोलिसात मारहाणीप्रकरणी तक्रार दिली. त्यावरुन नरेंद्र रामादासे याच्याविरोधात गुन्हा दाखल झाला आहे. पुढील तपास सहाय्यक फौजदार संजय चौधरी करीत आहेत.
