बोदवड (प्रतिनिधी) महाराष्ट्र नागरी सेवा नियम १९८२ पूर्ववत लागू करुन कर्मचाऱ्यांना जुनी पेन्शन योजना लागू करावी, या मागणीसाठी बोदवड तालुक्यातील प्राथमिक, माध्यमिक व उच्च माध्यमिक शिक्षक शिक्षकेतर बांधव, आरोग्य विभागातील कर्मचारी तसेच विविध प्रशासनातील कर्मचारी व अधिकारी यांचा मोर्चा बोदवड तहसील कार्यालयावर काढण्यात आला. यावेळी महाराष्ट्र राज्य प्राथमिक शिक्षक संघटनेचे राज्याचे नेते श्री जाधव यांनी संबोधित केले.
डॉ. बाबासाहेब आंबेडकर यांच्या पुतळ्याला अभिवादन करून, या मोर्चाला प्रारंभ झाला. शासकीय सेवेतील विविध संवर्गातील कर्मचारी हातात फलक घेऊन मोर्चामध्ये सहभागी झाले होते. जुनी पेन्शन योजना लागू झालीच पाहिजे, अशा घोषणा यावेळी देण्यात आल्या. हा मोर्चा तहसीलदार कार्यालयावर धडकला. यावेळी संघटनेच्या पदाधिकाऱ्यांनी मोर्चाला मार्गदर्शन केले. १ नोव्हेंबर २००५ रोजी व त्यानंतर नियुक्त होणाºया कर्मचाऱ्यांना १९८२ व १९८४ अंतर्गत निवृत्ती वेतन योजना बंद करुन परिभाषित अंशदायी पेंशन योजना लागू करण्यात आली आहे. या योजनेचे स्वरुप व अंमलबजावणी पाहता जुन्या पेन्शन प्रमाणे सुनिश्चित निवृत्ती वेतन मिळत नसल्याने कर्मचाºयांचे सेवानिवृत्तीनंतरचे जीवन असुरक्षित झाले आहे. त्यामुळे कर्मचाऱ्यांमध्ये तीव्र असंतोष असून जुनी पेन्शन योजना लागू करावी, अशी मागणी केली जात आहे. त्याचप्रमाणे २३ आॅक्टोबर २०१७ चा वरिष्ठ वेतन श्रेणीचा अन्यायकारक शासन निर्णय रद्द करावा, २०१२ नंतर नियुक्त शिक्षकांना टीईटी परीक्षेतून वगळण्यात यावे इ. मागण्या यावेळी करण्यात आल्या.या आंदोलनात संघटनेचे संपात सहभागी असलेले विविध विभागातील कर्मचारी व अधिकारी सहभागी झाले होते.
