कौटुंबिक स्नेहसंमेलनाने महावितरण कर्मचाऱ्यांना मिळाली नवी ऊर्जा

स्टेशन परिसरात जुन्या वादातून तरुणावर गोळीबार

जुन्या वादाची खुन्नस ठेवून फायनान्स कर्मचाऱ्याचा गळा आवळून खून

जळगाव प्रतिनिधी : महाlवितरणच्या जळगाव परिमंडल व मंडलातील कर्मचाऱ्यांचे ‘स्नेहबंध’ हे कौटुंबिक स्नेहसंमेलन बुधवारी (17 डिसेंबर) उत्साहात पार पडले. ग्राहकांना अविश्रांत सेवा देणाऱ्या कर्मचाऱ्यांना या सोहळ्यामुळे नवी ऊर्जा मिळाली.
जळगाव परिमंडलाचे मुख्य अभियंता इब्राहिम मुलाणी यांच्या प्रमुख उपस्थितीत महाबळ येथील छत्रपती संभाजीराजे नाट्यमंदिरात हा सोहळा रंगला. प्रमुख अतिथी म्हणून अधीक्षक अभियंता विनोद पाटील, सहायक महाव्यवस्थापक महेश बुरंगे, उपमुख्य औद्योगिक संबंध अधिकारी अरुण शेलकर, कार्यकारी अभियंता मानसी सुखटनकर उपस्थित होते.
याप्रसंगी मुख्य अभियंता मुलाणी म्हणाले की, दैनंदिन कामाबरोबरच विविध क्षेत्रात महावितरणचे कर्मचारी उत्कृष्ट कामगिरी करत आहेत. एकाच महिन्यात सर्वाधिक सौर कृषिपंप बसवण्याच्या महावितरणच्या कामाची गिनीज बुक ऑफ वर्ल्ड रेकॉर्ड्समध्ये नुकतीच नोंद झाली. या विक्रमात सर्व कर्मचाऱ्यांचा मोलाचा वाटा आहे. कर्मचाऱ्यांच्या उत्कृष्ट कामगिरीत त्यांच्या कुटुंबियांचीही महत्त्वाची भूमिका आहे. अनेक वेळा रात्री-अपरात्री खंडित झालेला वीजपुरवठा पूर्ववत करण्यासाठी तांत्रिक कर्मचाऱ्यांना कर्तव्यावर हजर व्हावे लागते. मात्र कसलीही तक्रार न करता कुटुंबीय त्यांना सांभाळून घेतात. त्यामुळे कामातून विरंगुळा मिळण्यासाठी हा कार्यक्रम आहे. कर्मचाऱ्यांचे पाल्यही विविध क्षेत्रात चमकत आहेत, हे कौतुकास्पद आहे. यापुढेही कर्मचारी महावितरणचा नावलौकिक उंचावतील, अशी अपेक्षा मुलाणी यांनी व्यक्त केली.
या सोहळ्यात कर्मचाऱ्यांनी विविध गुणदर्शन सादर करून उपस्थितांना मंत्रमुग्ध केले. योगेश गांगुर्डे, ज्योती दुसाने, सुरेश गुरचळ, विशाल आंधळे, योगेश जैस्वाल व अंकिता पांडे यांनी सुमधुर गाणी गायली. महेंद्र महाजन यांनी काव्य वाचन केले. कुडाळ (जि.सिंधुदुर्ग) येथील साई कला मंचाने मराठी संस्कृतीचे दर्शन घडवणारा ‘रंगी रंगला महाराष्ट्र’ हा गीतसंगीतनृत्याचा बहारदार कार्यक्रम सादर केला.
प्रास्ताविक उपमुख्य औद्योगिक संबंध अधिकारी अरुण शेलकर यांनी केले. सूत्रसंचालन कनिष्ठ अभियंता रत्ना पाटील यांनी केले. जनसंपर्क अधिकारी ज्ञानेश्वर आर्दड यांनी आभार मानले. कार्यकारी अभियंता दत्तात्रय साळी, चेतन नंदनवार, शिवाजी चव्हाण, गणेश महाजन, सखाराम थान्वी, प्रणाली विश्लेषक मनोज भराडे, वरिष्ठ व्यवस्थापक अमित सोनवणे, गणेश लिधुरे, व्यवस्थापक तन्वी मोरे यांच्यासह विविध कामगार संघटनांचे पदाधिकारी, परिमंडलातील कर्मचारी व त्यांच्या कुटुंबियांनी मोठ्या संख्येने उपस्थित राहून या सोहळ्याचा आनंद घेतला.: महावितरणच्या कौटुंबिक स्नेहसंमेलनात मुख्य अभियंता इब्राहिम मुलाणी यांचे स्वागत करताना अधीक्षक अभियंता विनोद पाटील. यावेळी सहायक महाव्यवस्थापक महेश बुरंगे, उपमुख्य औद्योगिक संबंध अधिकारी अरुण शेलकर, कार्यकारी अभियंता मानसी सुखटनकर.