कासोदा ता. एरंडोल (प्रतिनिधी) तालुक्यातील वनकोठे साखर कारखाना परिसरात राहणारे रामचंद्र भिल यांची तरुण मुलगी काम करीत असताना अचानक सर्पदंश झाल्याने तिचा मृत्यू झाला. त्यामुळे कुटूंबावर दुःखाचा डोंगर कोसळला होता. कुटुंबाची आर्थिक परिस्थिती गरिबीची असून मोलमजुरी करून ते उदरनिर्वाह करतात. या घडलेल्या घटनेची दखल प्रहार संघटनेने घेऊन रामचंद्र भिल यांच्या परिवाराला नुकतीच आर्थिक मदत केली.
ह्या घडलेल्या घटनेची दखल प्रहार अपंग क्रांतीचे तालुकाध्यक्ष योगेश चौधरी यांनी घेऊन त्यांनी परिसरातील लोकांना एकत्र करून कासोदा गाव परिसरात मदत फेरी काढून काही प्रमाणात धान्य व रोख रक्कम गोळा केली होती. व ही मदत ह्या गरजू कुटुंबाला पोहोचवणे गरजेचे होते. कारण लॉकडाऊनमुळे त्यांना कोणतेही काम मिळेनासे झाले होते. परंतु वनकोठे गाव कोरोना हॉटस्पॉट घोषित झाल्याने गोळा झालेली मदत त्यांच्यापर्यंत पोहोचविण्यासाठी अडचणी येत होत्या. आज १ मे महाराष्ट्र दिनाचे औचित्य साधून कमी लोकांच्या उपस्थितीत रामचंद्र भील यांच्या घरी जाऊन त्यांना आर्थिक मदत देण्यात आली.
यावेळी प्रहार क्रांतीचे तालुकाध्यक्ष योगेश चौधरी, गुलाब गंभीर पाटील, शेखर सुरेश पाटील, देवा मामा, अमोल बडगुजर यांची उपस्थिती होती. रामचंद्र भील यांनी कासोदा गाव परिसरातील सर्व नागरिक तसेच व्यापारी वर्गाचे आभार मानले आहेत.
