जळगाव (प्रतिनिधी) – शहरातील शिव कॉलनी जवळील रेल्वे उड्डाणपुलावर अज्ञात अवजड वाहनाने दुचाकीस्वार वृद्धाला चिरडल्याची धक्कादायक घटना आज दुपारी १.३० वाजेच्या सुमारास घडली आहे. तर दुसरी घटना ही जळगाव शहरातील ममुराबाद रस्त्यावरील मितवा हॉटेलजवळ घडली. या घटनेत सिमेंटने भरलेल्या भरधाव ट्रॅक्टरने दुचाकीस्वाराला जोरदार धडक दिल्याने दुचाकीस्वार तरुणाचा जागीच मृत्यू झाला आहे.
जळगाव शहरातील खोटे नगर कडून शहरात येणाऱ्या वृद्ध दुचाकीस्वाराचा अपघात झाला. भारमल कौतिक पाटील (वय ६५,रा. वैजनाथ ता. एरंडोल), असे मयताचे नाव आहे. ते त्यांच्या दुचाकी (क्रमांक: एमएच १९ बी डब्ल्यू २७३०) ने जळगाव शहरात येत असताना, शिव कॉलनी जवळील रेल्वे उड्डाणपुलावर अवजड वाहनाने त्यांच्या दुचाकीला मागून जोरदार धडक दिली. या अपघातात वृद्ध दुचाकीस्वार वाहनाच्या अवजड वाहनाच्या चाकाखाली आल्याने चिरडले गेले आणि ते जागीच ठार झाले. घटनेची माहिती मिळताच जिल्हापेठ पोलिसांनी घटनास्थळी धाव घेतली. मयत झालेल्या वृद्धाची ओळख अद्याप पटलेली नाही. पोलिसांनी मृतदेहाचा पंचनामा करून शवविच्छेदनासाठी जिल्हा शासकीय वैद्यकीय महाविद्यालयात पाठवला आहे.
ममुराबाद रस्स्त्यावर ट्रॅक्टरच्या धडकेत दुचाकीस्वाराचा मृत्यू
जळगाव तालुक्यातील ममुराबाद गावात विलास भील हे आपल्या कुटुंबासह वास्तव्याला होते. ते ऊस तोडण्याचे काम करून आपला उदरनिर्वाह करत होते. गुरूवारी १६ जानेवारी रोजी दुपारी १ वाजेच्या सुमारास ममुराबाद रस्त्यावरील हॉटेल मितवा जवळून जात असताना, समोरून येणाऱ्या सिमेंटने भरलेल्या ट्रॅक्टर (क्रमांक: एमएच १९ पीआय ३३७५) ने त्यांना जोरदार धडक दिली. या अपघातात विलास भील हे जागीच ठार झाले. या घटनेची माहिती मिळताच जळगाव तालुका पोलीस घटनास्थळी दाखल झाले. मृतदेहाचा पंचनामा करून जिल्हा शासकीय वैद्यकीय महाविद्यालयात शवविच्छेदनासाठी पाठवण्यात आला. पोलिसांनी ट्रॅक्टरवरील अज्ञात चालकावर गुन्हा दाखल करण्याची प्रक्रिया सुरू केली आहे. विलास भील यांच्या पश्चात पत्नी, चार मुली आणि एक मुलगा असा परिवार आहे.
