भुसावळ (प्रतिनिधी) आपल्या शेकडो वर्षाचा इतिहास असलेले वारकरी संत समुदायातील विविध संतांचे नाव आणि त्यांचे यथायोग्य विवेचन म्हणजे नर्मदा परिक्रमा आहे,असे अनुभव कथन परिक्रमवासी डॉ. नि.तु. पाटील यांनी आज केले. ते भुसावळ शहरातील नाहाटा कॉलेजमध्ये श्री गुरूदेव ज्येष्ठ नागरिक मंडळाच्या साप्ताहिक सभेत सत्कार प्रसंगी बोलत होते.
यावेळी व्यासपीठावर अध्यक्ष प्रकाश विसपुते, प्रा. बी. डी. चौधरी,वासुदेव जेष्ठ नागरिक संघाचे अध्यक्ष धनराज पाटील उपस्थित होते.यावेळी मामा पाचपांडे यांच्या हस्ते डॉ. नि.तु. पाटील यांचा सत्कार शाल,बुके आणि श्री गजानन विजय हा ग्रंथ देऊन झाला.सप्टेंबर महिन्यात ज्या सभासदांचा वाढदिवस आहे त्यांना डॉ. नितु पाटील यांच्या हस्ते भेटवस्तू देऊन गौरविण्यात आले.
पुढे डॉ. नितु पाटील म्हणाले की,नर्मदा परिक्रमा ही वारकरी संप्रदायाच्या संतांच्या नावाच्या जयघोषावर आधारित आहे.
आपल्यातील मी पणाची जेव्हा निवृत्ती(संत निवृत्तीनाथ) होईल तेव्हा नर्मदा माता परिक्रमा करण्याचे ज्ञान(संत ज्ञानदेव) प्राप्त होते.मग निश्चितच आपला परिक्रमा मार्ग सोफा (संत सोपानदेव)होतो आणि आपण मुक्तपणे(संत मुक्ताबाई) माता परिक्रमा करतो. परिक्रमा करतांना नर्मदा माताच आपली काळजी घेते,सांभाळून घेते,(संत एकनाथ) आणि मातेच्याच नावाचा (संत नामदेव)सतत जप सुरू असतो.शेवटी आपले आदर्श म्हणजे संत तुकाराम महाराज, ज्यांनी प्रपंचासोबत परमार्थ साधला आणि श्री विठ्ठल चरणी लिन झाले. त्यामुळे पंढरीच्या वारीचे व्यापक स्वरूप म्हणजे नर्मदा परिक्रमा आहे, असे विविध अनुभव डॉ नितु पाटील यांनी सांगितले.
तसेच काही विषयावर चर्चा झाली.तसेच आगामी काळात नर्मदा परिक्रमा अनुभवावर एक पुस्तक लिहिण्याचे काम नि.तु.पाटीलचे वर्गमित्र सुश्रुत जळूकर यांनी हाती घेतले असून लवकरच त्याचे प्रकाशन होईल.यावेळी कार्यक्रमच्या सुरवातीपासून बीजबत्ती नव्ह्ती तरीपण सर्व जेष्ठ नागरिक जवळजवळ 108 मिनिटे शांतचित्ताने अनुभव कथन ऐकत होते. यावेळी परिचय नारायण पाटील,सूत्रसंचालन प्रा. . बी.डी चौधरी तर आभार प्रदर्शन प्रकाश तायडे यांनी केले. कार्यक्रमानंतर अल्पोपहाराचा कार्यक्रम झाला.कार्यक्रमाच्या यशस्वीतेसाठी रमाकांत पाटील,एम यू पाटील, महादेव हरीमकर,साधना हरीमकर,निर्मला पाटील, सुनीता पाटील, यांनी परिश्रम घेतले.
