मुंबई (वृत्तसंस्था) शिवसेना खासदार संजय राऊत यांनी ईडीसंदर्भात देशाचे पंतप्रधान नरेंद्र मोदी यांना पत्र लिहिलं आहे. १३ पानांचं पत्र लिहिलं असून मंगळवारी हे पत्र पंतप्रधानांना देणार असल्याचं संजय राऊत यांनी म्हटलं. तसंच, या पत्रावरून केंद्रीय तपास यंत्रणा भ्रष्टाचाराने किती पोखरल्या आहेत हे समजणार असल्याचंही राऊत यांनी म्हटलं. त्यामुळं या पत्रातून नेमकं काय उलघडणार हे पाहणं महत्वाचं ठरणार आहे.
संजय राऊत यांनी शिवसेना भवनातच पत्रकार परिषद घेणार असून वेळदेखील दुपारी ४ ची आहे. संजय राऊत यावेळी पुन्हा एकदा भाजपा नेत्यांवर निशाणा साधणार असून भ्रष्टाचारी भाजपा नेत्यांचे मुखवटे उघडे पाडण्याचा इशारा दिला आहे. मुंबईत प्रसारमाध्यमांशी बोलताना त्यांनी आपण ईडीसंदर्भात पंतप्रधानांना १३ पानी पत्र लिहिलं असल्याची माहितीदेखील दिली.
“जे सत्य आहे, जो अन्याय आहे त्याला टार्गेट म्हणू नका. समोरच्या काही प्रमुख लोकांचे भ्रष्टाचार आणि घोटाळे समोर आणले जात आहेत. काही विशिष्ट लोक आमच्यावर हल्ले करतात आणि त्याचवेळी मोठे घोटाळे करुन नामनिराळे राहतात. त्यांचे मुखवटे फाडले पाहिजेत,” असं संजय राऊत म्हणाले आहेत. “ईडी संदर्भात मी पंतप्रधान नरेंद्र मोदींकडे १३ पानांचे पुराव्यासह पत्र दिलं आहे. अनेक पत्रकारांनी ते पत्र मीडियासमोर, देशासमोर ठेवण्याची विनंती केली आहे. ते पत्र मी आज देणार आहे. त्या पत्रावरुन केंद्रीय तपास यंत्रणा भ्रष्टाचाराने किती पोखरल्या आहेत, कोणाच्या नियंत्रणाखाली काम करतात आणि राजकीय विरोधकांची कोंडी करुन, अडचणीत आणून भाजपाच्या राजकारणाला हातभार लावतात हे सगळं आहे. हे टप्पयाटप्याने बाहेर येईल. आज पहिला भाग बाहेर काढत आहे,” असा इशारा संजय राऊतांनी दिला आहे.
दरम्यान यावेळी त्यांना एक्झिट पोलसंबंधी विचारण्यात आलं असता ते म्हणाले की, “एक्झिट पोलवर जाऊ नका. यापूर्वीही याचा फज्जा उडाल्याचा बघितलं आहे. प्रत्यक्ष मतपेटीतून काय बाहेर येत त्यावर मत व्यक्त करुयात. या देशातील अनेक राज्यांमध्ये प्रस्थापितांविरुद्ध राग आहे आणि तो मतपेटीतून स्पष्ट दिसेल”.
