चोपडा (प्रतिनिधी) तालुक्यातील गणपूर येथील जिल्हा परिषद प्राथमिक शाळेत विद्यार्थ्यांना प्रात्यक्षिक दाखवून तयार केलेल्या सिडबॉलची पेरणी नुकतीच गावाजवळील दरी कपारीत विद्यार्थ्यांनी केली.
नव्याने निर्माण करण्याची शक्ती निर्सगात आहेच. आपण फक्त निमित्त मात्र ठरतो. वर्षभर आपण विविध प्रकारची फळे आहारात घेत असतो. त्या फळांच्या बिया फेकून न देता विद्यार्थ्यांनी संग्रहित केल्या व त्यापासून सिडबॉल बनविले. सिडबॉल म्हणजे बीज गोळे, बियांना हलक्या अशा मातीच्या गोळ्यामध्ये साठवून ते गोळे सुकवून ठेवले गेले आहेत. आता पाऊस पडताच त्या जमिनीत टाकल्या गेल्या. गोळ्यातील बीज अंकुरते व तिथे झाड आपोआप उगवते, असा हा प्रयोग आहे.
विद्यार्थ्यांनी या उपक्रमास भरभरून प्रतिसाद देऊन आपल्या स्तरावर शेकडो सिडबॉल बनविले. यात आंबा, जांभूळ, चिंच, या फळबिया तसेच लिंब, या सारखी सावली देणारे अनेक झाडांच्या बिया वापरून बीजगोळे बनविण्यात आले होते. ते आज जमिनीत टाकण्यात आले. यावेळी शिक्षक व शिक्षिका उपस्थित होते.
