जळगाव प्रतिनिधी । राज्यातील डिपीडिसीलला कोविड १९ विषाणूच्या प्रतिकारासाठी उपाययोजना करण्यासाठी उपलब्ध करण्यात आलेल्या ३३ टक्के निधीतील ५० टक्के निधी आरोग्यावर खर्च करण्याची नुकतीच मंजुरी देण्यात आली आहे. राज्याचे पाणीपुरवठा व स्वच्छता मंत्री गुलाबराव पाटील यांनी केलेल्या मागणीला मंत्रीमंडळाने शिक्कामोर्तब केले आहे. यामुळे राज्यातील कोविड १९ च्या प्रतिकारासाठी रुग्णांना लाभ होणार आहे. जिल्ह्यातील कोविडसाठी तब्बल ६१ कोटी खर्च करता येणार असल्याने कोविडचा प्रादुर्भाव रोखण्यास मदत होईल.
अधिक माहिती अशी की, राज्यात कोरोना विषाणूचा प्रसार झाल्यामुळे आरोग्य यंत्रणांना वाढीव निधी देण्याचा निर्णरू राज्रू सरकारने घेतला होता. यासंदर्भात मंत्रीमंडळ उपसमितीच्या उपमुख्यमंत्री अजित पवार यांच्या अध्यक्षतेखाली १४ एप्रिल रोज झालेल्या बैठकीत जिल्हा वार्षिक योजना सन २०२०-२१ च्या अंतर्गत उपलब्ध होणार्‍या ३३ टक्के तरतुदीपैकी २५ टक्के निधी हा कोविड १९ विषाणूवरील उपाययोजना आणि सार्वजनिक आरोग्य विभाग तसेच वैद्यकीय शिक्षण व औषधी द्रव्ये विभागाच्या जिल्हास्तरीय आरोग्य विषयक सुविधा बळकट करण्यासाठी राखीव ठेवण्यात आला होता. २९ मे रोजीच्या पत्रकान्वये याला खर्च करण्याची मंजुरी देखील देण्यात आली होती.
पालकमंत्री ना.गुलाबराव पाटील यांच्या प्रयत्नांनी झालेल्या या शासन निर्णयाचा राज्यासह जिल्ह्यातील आरोग्य सेवेच्या बळकटीकरणासाठी उपयोग होणार आहे. जळगाव जिल्ळ्यासाठी २०२०-२१ या वर्षासाठीच्या अर्थसंकल्पात तरतूद ३७५ कोटीच्या ३३ टक्के अर्थात १२३ कोटी ७४ लक्ष ९९ हजार निधी उपलब्ध होणार आहे. त्याच्या ५० टक्के म्हणजे ६१ कोटी ८८ लक्ष निधी कोविडचा प्रसार रोखण्यासाठी आणि उपाययोजनांसाठी खर्च करण्यात येणार आहे. याचा लाभ सर्वसामान्य नागरिकांना होणार आहे. ना. पाटील यांनी केलेल्या मागणीमुळे जिल्ह्यातील आरोग्यसेवेला बळकटी येणार आहे.
दरम्यान कोरोना संसर्गाचा प्रकोप वाढत असल्यामुळे ३३ टक्क्यांमधील २५ टक्के रक्कम ही अपूर्ण पडत असल्याने राज्य शासनाने ही मर्यादा वाढवावी, अशी मागणी पालकमंत्री पाटील यांनी केली होती. या मागणीला नुकत्याच झालेल्या राज्य मंत्रीमंडळाच्या बैठकीत मान्यता देण्यात आली आहे. त्यामुळे आता जिल्हा वार्षिक योजना सन २०२०-२१ च्या अंतर्गत उपलब्ध होणार्‍या ३३ टक्के तरतुदींपैकी ५० टक्के निधी हा कोरोना उपाययोजना आणि सार्वजनिक आरोग्य विभाग तसेच वैद्यकीय शिक्षण व औषधी द्रव्ये विभागाच्या जिल्हास्तरीय आरोग्य विषयक सुविधा बळकट करण्यासाठी वापरण्याची मंजुरी देण्यात आली आहे अशी माहिती सूत्रांनी दिली. दरम्यान जळगाव जिल्ह्यात कोरोना संसर्गाचा प्रादुर्भाव रोखण्यासाठी उपलब्ध निधीचा उपयोग गरजूंच्या उपचारासाठी होणार आहे.
