बारामती (वृत्तसंस्था) मराठा आरक्षणासाठी अजित पवारांच्या निवासस्थानासमोर होणार “ढोल बजाओ’ आंदोलन ! मराठा समाज आरक्षणाच्या मागणीसाठी शनिवारी (दि. २६) सकाळी ९ ते ११ दरम्यान उपमुख्यमंत्री अजित पवार यांच्या निवासस्थानासमोर “ढोल बजाओ’ आंदोलन करणार आहे.
याबाबत काढलेल्या पत्रकात म्हटले आहे की, मराठा आरक्षणाला सर्वोच्च न्यायालयात अंतरिम स्थगिती मिळाल्यानंतर राज्यभर मराठा समाजाच्या वतीने आंदोलन केली जात आहेत. याचाच एक भाग म्हणून आता उपमुख्यमंत्री अजित पवार यांच्या बारामतीतील भिगवण रस्त्यावरील सहयोग सोसायटीमधील निवासस्थानासमोर बारामती शहर व तालुक्‍यातील मराठा क्रांती मोर्चाच्या सदस्यांकडून ढोल वाजवून आंदोलन केले जाणार आहे. तसेच मराठा समाजावर अन्याय होतो आहे, तरीही आपण कायदा व सुव्यवस्था त्याचसोबत स्वतःची व सामाजिक स्वास्थ्याची जबाबदारी घेत हे आंदोलन करायचे असल्याचे याबाबतच्या पत्रकात नमूद करण्यात आले आहे. तर आंदोलन करताना पोलीस प्रशासनाचे नियम, कोरोनाच्या दृष्टीने आवश्‍यक सोशल डिस्टन्सिंग, मास्कचा तसेच वेळोवेळी सॅनिटायझरचा वापर करणे याबाबी पाळणे बंधनकारक असल्याच्या सूचना देण्यात आल्या आहेत.
