एरंडोल (प्रतिनिधी) येथील नगरपालिकेच्या उपनगराध्यक्ष जयश्री पाटील यांनी राजीनामा दिल्यामुळे रिक्तपदावर योगेश महाजन यांची बिनविरोध निवड करण्यात आली आहे. दरम्यान, युवक काँग्रेसचे प्रदेशाध्यक्ष सत्यजित तांबे यांनी श्री. महाजन यांना फोनवरून शुभेच्छा दिल्या आहेत.
एरंडोल नगरपालिकेचे उपनगराध्यक्ष जयश्री पाटील यांनी राजीनामा दिल्यामुळे रिक्त झालेल्या पदाकरिता सोमवार २८ सप्टेंबर रोजी विशेष सभेचे आयोजन करण्यात आले होते. सभेच्या पिठासीन अधिकारी तथा तहसीलदार एरंडोल अर्चना खेतमालीस यांनी काम पाहिले. उपनगराध्यक्षपदासाठी एकमेव उमेदवार योगेश महाजन यांचाच दाखल झाल्याने त्यांची निवड बिनविरोध घोषित करण्यात आली. निवडणुक कामी पिठासीन अधिकारी तथा तहसीलदार अर्चना खेतमाळीस यांना मुख्याधिकारी किरण देशमुख, कार्यालयीन अधीक्षक संजय ढमाळ यांनी सहकार्य केले. नवनियुक्त उनगराध्यक्ष योगेश महाजन यांचे लोकनियुक्त नगराध्यक्ष रमेश परदेशी यांनी अभिनंदन केले.