जळगाव (प्रतिनिधी) शहरातील नाथवाडा परिसरात सिंधी कॉलनी रस्त्यावर एका तरुणाचा गळा चिरून खून करण्यात आल्याची घटना सोमवारी पहाटेच्या सुमारास उघडकीस आली आहे. ललित प्रल्हाद वाणी (वय-४५), असे खून झालेल्या व्यक्तीचे नाव आहे. दरम्यान, एमआयडीसी पोलिसांनी घटनास्थळी धाव घेत तपासचक्र फिरवायला सुरुवात केली आहे.
जळगाव शहरातील नाथ वाडा परिसरात राहणारे ललित वाणी हे सुप्रीम कंपनी गाडेगाव येथे कामाला आहेत. रात्री ११.४५ वाजेच्या सुमारास कामावरून ते घरी येत असताना सिंधी कॉलनी ते नाथवाडा रस्त्याने ते घरी येत होते. सोमवारी पहाटेच्या सुमारास मुख्य चौकात बांधकाम सुरू असलेल्या इमारतीच्या बाहेर वाळूवर त्यांचा मृतदेह मिळून आला. घटनेची माहिती मिळताच एमआयडीसी पोलीस ठाण्याचे निरीक्षक बबन आव्हाड यांनी आपल्या पथकासह धाव घेतली.
मयत ललित वाणी यांच्या गळ्यावर अज्ञात इसमानी वार केल्याने त्यांचा मृत्यू झाला आहे. दरम्यान, उपविभागीय पोलीस अधिकारी संदीप गावीत हे घटनास्थळी पोहचले असून फॉरेन्सिक टीम नमुने घेत आहे. खून कोणी आणि का केला?, याची माहिती अद्याप मिळू शकली नसली. तरी पोलिसांना मारेकऱ्यांशी संबंधित धागेदोरे मिळाले असल्याचे कळते.
