लाहोर (वृत्तसंस्था) काही दिवसांपूर्वी पाकिस्तानातील रहीम यार खान जिल्ह्यातील भोंग शहरात काही समाजकंठकांनी गणेश मंदिराची तोडफोड केली होती. या घटनेचे व्हिडीओ सोशल मीडियात व्हायरल झाल्यानंतर पाकिस्तानवर चौफेर टीका करण्यात येत होती. याप्रकरणी आता पोलिसांनी ५० आरोपींना अटक केली असून इतर १५० जणांवर गुन्हा दाखल करण्यात आला आहे.
पाकिस्तानमध्ये अल्पसंख्यांक हिंदूंच्या मंदिराची तोडफोड करण्यात आली आहे. मंदिराचे संरक्षण करण्यात अपयशी ठरल्याबद्दल पाकिस्तानच्या सर्वोच्च न्यायालयाने अधिकाऱ्यांना फटकारले होते. ज्यानंतर कारवाई करण्यात आली आहे. लाहोरपासून ५९० किमी अंतरावर रहिम यार खान जिल्ह्यातील भोंग शहरात बुधवारी जमावाने गणेश मंदिरावर हल्ला केला.
रहिम यार खान जिल्ह्यातील जिल्हा पोलीस अधिकारी सरफराज यांनी सांगितलं की, ‘भोंगमधील कथित मंदिर हल्ल्याप्रकरणी आम्ही आतापर्यंत ५० संशयितांना अटक केली आहे. सीसीटीव्ही फुटेजची चौकशी सुरू आहे. येत्या काही दिवसांत संबंधित अन्य आरोपिंना देखील अटक केली जाईल.’
ते पुढे म्हणाले, दहशतवादाच्या आणि पाकिस्तान दंड संहितेच्या (पीपीसी) संबंधित कलमांखाली मंदिरावर हल्ला केल्याबद्दल १५० पेक्षा जास्त लोकांवर एफआयआर नोंदवण्यात आला आहे.’ त्याचप्रमाणे सर्वोच्च न्यायालयाने दिलेल्या आदेशानुसार मंदिराच्या दुरुस्तीचं काम सुरू करण्यात आल्याचं देखील त्यांनी सांगितलं.
नेमकं प्रकरण काय आहे?
बुधवारी ४ ऑगस्ट रोजी पाकिस्तानातील बहुसंख्य असणाऱ्या मुस्लीम समुदायातील काही समाजकंठकांनी हिंदू समुदायाच्या गणेश मंदिराची तोडफोड केली होती. लाहोर शहरापासून ५९० किमी अंतरावर असणाऱ्या रहीम यार खान जिल्ह्यातील भोंग याठिकाणी ही घटना घडली होती. तोडफोड करणाऱ्या तरुणांचं विकृत कृत मंदिरात लावण्यात आलेल्या सीसीटीव्ही कॅमेऱ्यात कैद झालं होतं.
