जळगाव (प्रतिनिधी) – शहरातील निवृत्तीनगर भागातील जिल्हा परिषदेत कार्यरत असलेल्या एका महिला कर्मचाऱ्याच्या घरातून अज्ञात चोरट्यांनी १ लाख ३५ हजार रुपये किमतीचे सोन्याचे दागिने चोरून नेले आहेत. विशेष म्हणजे, घरात लग्नामुळे पाहुण्यांची मोठी वर्दळ असताना आणि घरातील सदस्य उपस्थित असतानाच ही चोरी झाली आहे.
यापक्ररणी जिल्हापेठ पोलीस ठाण्यात गुन्हा दाखल करण्यात आला आहे.
शहरातील निवृत्ती नगरातील रहिवासी लताबाई पंडीत सपकाळे (वय ५३) या जिल्हा परिषदेत शिपाई आहे. दि. ३ मार्च रोजी त्यांच्या नातेवाईकाकडे लग्न कार्य असल्याने निवृत्ती नगरमधील त्यांच्या घरात अनेकांचीये-जा आणि लगबग सुरू होती. या वर्दळीचा फायदा घेत अज्ञात चोरट्याने किचनमध्ये ठेवलेल्या दागिन्यांवर डल्ला मारला. घरातील सर्वजण कामात व्यस्त असतानाच या दागिन्यांची चोरी झाल्याने खळबळ उडाली आहे. संबंधित महिलेने काही कामानिमित्त आपले सोन्याचे दागिने घरातील किचनमध्ये ठेवले होते. लग्नाच्या धामधुमीत घरात कोणाचेही लक्ष नसल्याचे पाहून चोरट्याने १ लाख ३५ हजार रुपये किमतीचे हे दागिने लंपास केले दागिने चोरीला गेल्याचे लक्षात येताच महिलेने तातडीने जिल्हापेठ पोलीस स्टेशन गाठले. त्यांच्या फिर्यादीवरून अज्ञात चोरट्याविरुद्ध गुन्हा दाखल करण्यात आला आहे.
