जळगाव (प्रतिनिधी) – प्रेमसंबंधाला विरोध करत प्रियकराच्या भावाने प्रेयसीला शिवीगाळ करत तिच्यावर गोळीबार केला. यात गुडघ्याला गोळी लागून संगीता बुधा बारेला (वय ३५, रा. गोपाळपुरा) ही महिला गंभीर जखमी झाली. ही घटना दि. २० ऑक्टोबर रोजी मध्यरात्री जुने बसस्थानकासमोर घडली. या प्रकरणी शहर पोलिस ठाण्यात अनिकेत मधुकर सपकाळे व एका अनोळखीविरुद्ध गुन्हा दाखल करण्यात आला असून त्यांना अटक करण्यात आली आहे.
शहरातील एका खासगी कंपनीत कामाला असलेल्या संगीता बुधा बारेला (वय ३५, रा. गोपाळपुरा) या महिलेच्या पतीने निधन झालेले आहे. त्या महिलेची पिंप्राळा परिसरातील सोनी नगरमधील रोहन मधुकर सपकाळे (वय ३०) याच्याशी ओळख झाली. नंतर ओळखीचे रुपांतर प्रेमसंबंधात झाले. मात्र या प्रेमसंबंधाला रोहनच्या घरच्यांचा विरोध आहे. दि. २० ऑक्टोबर रोजी विजयादशमीच्या दिवशी महिला मेहरुण तलावावर रावण दहन पाहण्यासाठी गेलेली असताना तेथे रोहन तिला जेवणाला घेऊन जाण्यासाठी गेला.
दुचाकीवरुन येत केला गोळीबार
तेथून ते दुचाकीने मध्यरात्री १२.३० ते १२.४५ वाजेदरम्यान महिलेच्या घराकडे जात असताना असताना त्यांच्या मागे अनिकेत सपकाळे व एक अनोळखी दुचाकीने आले. त्यांनी दोघांना सोबत बघितल्यानंतर अनिकेतने महिलेला शिवीगाळ करत तिच्यावर कद्वयातून गोळीबार केला. यात महिलेच्या गुडघ्याला गोळी लागून ती जखमी झाली. तिला प्रियकराने शासकीय वैद्यकीय महाविद्यालय व रुग्णालायत दाखल केले.
दोघांविरुद्ध शहर पोलिसात गुन्हा दाखल
गंभीर जखमी झालेल्या महिलेने दि. २१ ऑक्टोबर रोजी महिलेने शहर पोलिस ठाण्यात फिर्याद दिली. त्यावरून अनिकेत मधुकर सपकाळे व एक अनोळखीविरुद्ध गुन्हा दाखल करण्यात आला आहे. तपास उपनिरीक्षक सावित्री ढगे करत आहेत.
