जळगाव, (प्रतिनिधी) – जिल्ह्यातील राज्य व राष्ट्रीय महामार्गांवरील रस्ते अपघातांचे प्रमाण कमी करून जीवितहानी रोखण्यासाठी जळगाव जिल्हा प्रशासनाकडून विविध उपाययोजना प्रभावीपणे राबविण्यात येत आहेत. ‘झिरो फॅटॅलिटी डिस्ट्रिक्ट’ उपक्रमांतर्गत अपघातप्रवण क्षेत्रांचे सर्वेक्षण, रस्ते अभियांत्रिकीतील आवश्यक सुधारणा आणि वाहतूक नियमांच्या प्रभावी अंमलबजावणीवर विशेष भर देण्यात येत आहे.
जिल्ह्यातील रस्ते अधिक सुरक्षित करण्यासाठी अपघातप्रवण ठिकाणांची ओळख करून तेथील त्रुटी दूर करण्याचे काम हाती घेण्यात आले आहे. तसेच, अपघात घडल्यानंतर जखमींना तातडीने वैद्यकीय मदत उपलब्ध करून देणे, महामार्गांवरील अतिक्रमणे हटविणे आणि वाहतुकीचे नियम काटेकोरपणे पाळले जातील यासाठी संबंधित विभागांमध्ये समन्वय साधण्यात येत आहे.
रस्ते अपघातांमधील मृत्यूंचे प्रमाण कमी करणे, अपघात रोखण्यासाठी प्रतिबंधात्मक उपाययोजना करणे आणि नागरिकांच्या सुरक्षित प्रवासाला प्राधान्य देणे, हा या उपक्रमाचा मुख्य उद्देश आहे. या अनुषंगाने जिल्हा प्रशासनाकडून विविध विभागांच्या माध्यमातून रस्ते सुरक्षा उपाययोजनांना गती देण्यात येत आहे.
यासंदर्भात गुरुवार, दि. २२ ऑक्टोबर २०२६ रोजी जिल्हाधिकारी कार्यालय, जळगाव येथे बैठक झाली. या बैठकीस पोलीस अधीक्षक, निवासी उपजिल्हाधिकारी, अपर पोलीस अधीक्षक यांच्यासह विविध विभागांचे अधिकारी उपस्थित होते. रस्ते अपघात रोखण्यासाठी समन्वयाने उपाययोजना राबविणे आणि अपघातांमुळे होणारी जीवितहानी कमी करण्यासाठी प्रशासन प्रयत्नशील आहे.
