जळगाव (प्रतिनिधी) – शहरातील प्रकाश मेडीकल ते महात्मा फुले मार्केट दरम्यान जावेद रसुल खान (वय ४०, रा. हमीदनगर चोपडा, ह.मु. मासुमवाडी) यांच्या खिशातून १० हजार रुपये चोरल्याची घटना घडली होती. शहर पोलीस ठाण्यातील गुन्हे शोध पथकाने तांत्रिक विश्लेषणाच्या आधारावर तिघ संशयित चोरट्यांच्या मुसक्या अवळल्या असून त्यांच्याकडून चोरलेला १० हजारांचा मुद्देमाल हस्तगत करण्यात आला.
शहरातील मुख्य बाजारपेठ असलेल्या घाणेकर चौक ते महात्मा गांधी मार्केट रस्त्यावरुन दि. ३० जुलै रोजी दुपारच्या सुमारास जावेद खान रसुल खान हे जात होते. यावेळी त्यांच्या पॅन्टच्या खिशातून दहा हजार रुपये चोरीस गेल्याची घटना घडली.याप्रकरणी शहर पोलीस ठाण्यात अज्ञात चोरट्यांविरुद्ध गुन्हा दाखल करण्यात आला होता. दरम्यान, पोलीस अधीक्षक श्रीकांत धिवरे यांच्यासह उपविभागीय पोलीस अधिकारी नितीन गणापुरे यांनी शहर पोलीस ठाण्यातील गुन्हे शोध पथकातील कर्मचाऱ्यांची बैठक घेवून त्यांना गुन्हा उघडकीस आणण्याच्या सूचना दिल्या.
तांत्रिक विश्लेषद्वारे केले निष्पन्न
पोलीस निरीक्षक सागर शिंपी यांनी लागलीच सफौ सुनिल पाटील, दीपक शिरसाठ, पोहेकॉ उमेश भांडारकर, सतिष पाटील, विरेंद्र शिंदे, योगेश शिंदे, नंदलाल पाटील, अमोल ठाकूर, राहुलकुमार पांचाळ, प्रणय पवार यांचे पथक तयार केले. या पथकाने नेत्रमच्या मुबारक देशमुख, कुंदनसिंग बयास, गौरव पाटील, मिलींद जाधव यांच्या मदतीने तांत्रिक विश्लेषणाद्वारे संशयित चोरट्यांना निष्पन्न केले.
