जळगाव (प्रतिनिधी) – वीजचोरीला आळा घालण्यासाठी महावितरणकडून विशेष मोहीम राबविण्यात येत असून, जळगाव तालुक्यातील घरगुती ग्राहकांसह व्यावसायिक आस्थापनांमधील अनधिकृत वीजवापरावरही कारवाईचा बडगा उगारण्यात येत आहे. महामार्गालगत असलेली हॉटेल, ढाबे आणि बिअर बार यांच्याकडून होणाऱ्या अनधिकृत वीजवापरावर विशेष लक्ष केंद्रित करण्यात आले आहे.
कार्यकारी अभियंता दत्तात्रय साळी, उपकार्यकारी अभियंता विजय कापुरे यांच्या नेतृत्वाखाली शिरसोली शाखेचे कनिष्ठ अभियंता रोहन पाटील व जळगाव उपविभागाच्या सहायक अभियंता माधुरी पाटील यांनी महामार्गालगतच्या हॉटेल, ढाबे व बिअर बारमधील अनधिकृत वीजवापराविरोधात विशेष मोहीम राबविली. या मोहिमेदरम्यान अनधिकृत वीजवापर करणाऱ्या तीन जणांविरुद्ध वीजचोरीप्रकरणी कारवाई करण्यात आली. संबंधित ग्राहकांना एक लाख रुपयांहून अधिक रकमेची दंडात्मक बिले देण्यात आली. या कारवाईतून व्यावसायिक आस्थापनांनीही अधिकृत वीजजोडणी घेऊनच वीज वापरणे आवश्यक असल्याचा स्पष्ट संदेश देण्यात आला.
लमांजन येथे एबी केबल टाकून २३ अनधिकृत वीजजोडण्यांना प्रतिबंध
लमांजन गावात वीजचोरीला प्रतिबंध करण्यासाठी कनिष्ठ अभियंता अर्जुन आव्हाड यांनी महत्त्वपूर्ण उपाययोजना केली. गावातील अनधिकृत वीजजोडण्या अर्थात आकडे टाकण्याच्या प्रकारांना आळा घालण्यासाठी एअर बंच केबल (एबी केबल) टाकण्यात आली. या उपाययोजनेमुळे २३ अनधिकृत वीजजोडण्या घेण्यास प्रतिबंध करण्यात यश आले. यासोबतच ग्रामस्थांमध्ये जनजागृती करून अनधिकृत वीजवापराऐवजी अधिकृत व नियमित वीजजोडणी घेण्याबाबत प्रबोधन करण्यात आले. या उपक्रमाला ग्रामस्थांकडून चांगला प्रतिसाद मिळाला असून, सुमारे ९० टक्के नागरिकांनी नियमित वीजजोडणी घेण्याची तयारी दर्शविली आहे. त्यामुळे वीजचोरी रोखण्यासोबतच नागरिकांना अधिकृत वीजपुरवठ्याच्या प्रवाहात आणण्याच्या दृष्टीने हा उपक्रम महत्त्वपूर्ण ठरत आहे.
आव्हाणे येथे सहा वीजआकडे हटविले; ३२.५ अश्वशक्तीचा अनधिकृत भार कमी
कानळदा शाखेचे कनिष्ठ अभियंता इम्तियाज अली यांनी आव्हाणे गावात कारवाई करून अनधिकृतरीत्या सुरू असलेले शेतीपंपांचे सहा वीजआकडे काढून टाकले. या कारवाईमुळे एकूण ३२.५ अश्वशक्तीचा अनधिकृत वीजभार कमी करण्यात आला. परिणामी, वितरण व्यवस्थेवरील सुमारे १८ अँपिअरचा भार कमी होण्यास मदत झाली आहे. यामुळे परिसरातील वीज वितरण व्यवस्थेवरील अतिरिक्त ताण कमी होण्यास हातभार लागला आहे.
महावितरणच्या या विशेष मोहिमेमुळे घरगुती ग्राहकांपासून व्यावसायिक आस्थापनांपर्यंत सर्वच स्तरांवरील अनधिकृत वीजवापराला आळा बसण्यास मदत होत आहे. वीजचोरीमुळे नियमित वीजबिल भरणाऱ्या ग्राहकांवर अप्रत्यक्ष आर्थिक भार पडण्याबरोबरच वीज वितरण व्यवस्थेवरही अतिरिक्त ताण निर्माण होतो. त्यामुळे नागरिकांनी अनधिकृत वीजजोडण्या घेणे टाळावे, अधिकृत वीजजोडणीद्वारेच वीज वापरावी आणि वीजचोरीविरोधातील मोहिमेला सहकार्य करावे, असे आवाहन महावितरणकडून करण्यात येत आहे.
