अडावद, ता. चोपडा (प्रतिनिधी) – गाढ झोपेत असलेल्या दोघ मुलांवर मद्याच्या नशेत असलेल्या जन्मदात्या पित्याने कुऱ्हाडीने सपासप वार केले. या घटनेत १३ वर्षीय मिरा सुभाष भिलाला (रा.वडती, अडावद, ता. चोपडा) या मुलीचा मृत्यू झाला. तर तिचा ११ वर्षीय भाऊ रामू सुभाष भिलाला हा गंभीर जखमी झाला असून त्याच्यावर उपचार सुरु आहे. गुन्हा दाखल होताच पोलिसांनी तपासचक्रे फिरवित संशयित सुभाष गोपाल भिलाला (वय ५०) याला अटक केली आहे.
चोपडा तालुक्यातील अडावद जवळील वडती येथे सुभाष भिलाला हा कुटुंबियांसह वास्तव्यास होता. त्याला दारुचे व्यसन असल्यामुळे तो दिवसभर दारुच्या नशेत राहत होता. शनिवारी रात्री जेवण करुन त्याचे कुटुंबिय झोपलेले असतांना, गाढ झोपेतच सुभाष भिलाला याने मध्यरात्रीच्या सुमारास दोघ मुलांवर कुऱ्हाडीने वार केले दोघ मुल घरात रक्ताच्या थारोळ्यात पडलेली असतांना संशयित सुभाष भिलाला हा तेथून पसार झाला. दरम्यान, ही घटना मुलांच्या आईच्या लक्षात येताच त्यांनी तात्काळ परिसरातील नागरिकांना बोलावून जखमींना तात्काळ रुग्णालयात दाखल केले.
घटनेमुळे गावात शोककळा
जखमी रामू याला जिल्हा रुग्णालयात हलविण्यात आले असून त्याच्यावर अतिदक्षता विभागात उपचार सुरु आहे. गंभीर जखमी रामू याचा रक्तदाब कमी होत होता, मात्र डॉ. गौरव नेवे यांनी उपचार करून रक्तदाब योग्य प्रमाणात आणला. नंतर पुढील उपचारासाठी त्यास जिल्हा रुग्णालयात रवाना करण्यात आले. तसेच मयत मीरा हीच्या मृतदेहाचे उपजिल्हा रुग्णालयात डॉ. सपना पाटील यांनी शवविच्छेदन केल्यनंतर तिच्यावर नातेवाईकांनी वडती येथे अंत्यसंस्कार केले.
तपासचक्रे फिरवित जंगलातून केली अटक
या घटनेबाबत वडती पोलीस पाटील नवल धनगर यांनी अडावद पोलिसांना सर्वप्रथम माहिती कळवली. तत्काळ चोपडा उपविभागीय पोलीस अधिकारी सुनील पाटील व अडावद पोलीस स्टेशनचे सहायक पोलीस निरीक्षक प्रशांत कंडारे यांनी आपल्या कर्मचाऱ्यांसह घटनास्थळ गाठले. त्यांनी संशयित मारेकऱ्याच्या शोधार्थ पथक रवाना केले. काही वेळातच पोलिसांनी तपासचक्रे फिरवित संशयीत सुभाष भिलाला याच्या गावाजवळील जंगलातून ताब्यात घेतले.
खूनाच्या घटनेचे कारण अस्पष्ट
या अमानुष कृत्यामागील नेमके कारण अद्याप स्पष्ट झालेले नसून कौटुंबिक वाद, मानसिक स्थिती किंवा इतर कोणत्या कारणातून ही घटना घडली का, याचा अडावद पोलीस सर्व बाजूंनी तपास करत आहेत.
मुलाची प्रकृती चिंताजनक; उपचार सुरु
कुऱ्हाडीने वार केल्यामुळे गंभीर जखमी झालेल्या मीरा भिलाला हीला डॉक्टरांनी तपासून मयत घोषीत केले. तर रामू भिलाला याची प्रकृती देखील चिंताजनक असून त्याच्यावर जिल्हा शासकीय वैद्यकीय महाविद्यालय व रुग्णालयात उपचार सुरु आहे. याप्रकरणी अडावद पोलिस ठाण्यात मुलांची आई मायाबाई सुभाष भिलाला यांच्या फिर्यादीवरून गुन्हा दाखल करण्यात आला आहे.
