जळगाव (प्रतिनिधी) – बंदुकीचा धाक दाखवत तालुक्यातील स्टेट बँक ऑफ इंडियाच्या शाखेमध्ये तोंडाला मास्क लावून आलेल्या चार जणांनी सशस्त्र दरोडा टाकला. बँकेतील लॉकरमधील रोकड व सोने असा कोट्यावधी रुपयांचा ऐवज सहा बॅगांमध्ये भरून दरोडेखोर दोन दुचाकीवरून पसार झाले. तालुका पोलिसांच्या सतर्कतेमुळे त्यांनी ग्रामस्थांच्या मदतीने पळून जाणाऱ्या दरोडेखोरांचा पाठलाग करीत त्यांच्या मुसक्या आवळल्या. त्यांच्याकडून सुमारे १५ लाख रुपये रोकड व ६ बॅग सोने जप्त केले आहे. ही घटना शनिवारी दुपारी अडीच वाजेच्या सुमारास भोकर गावात घडली.
तालुक्यातील भोकर येथे असलेल्या स्टेट बँक ऑफ इंडियाच्या शाखेत तोंडाला मास्क आणि हेलमेट घालून चार संशयितांनी आत प्रवेश केला. त्यांच्याजवळ असलेल्या एअरगनचा धाक दाखवित त्यांनी बँकेत असलेल्या कर्मचाऱ्यांना धमकाविले. दरम्यान, बँकेतील मॅनेजर आणि कॅशीरला लॉकरच्या चाब्या सोबत घेवून लॉकरकडे घेवून जात असतांना सुरक्षा रक्षकाने त्याला विरोध केला. मात्र एका दरोडेखोराने सुरक्षरक्षकाच्या दिशेने पायाजवळ हवेत फायर केला. त्यानंतर बंदुकाची धाक दाखवत त्यांना लॉकर उघडण्यास सांगितले. त्या वेळी बँकेतील १६ लॉकरमधील सोने आणि सुमारे १५ लाख रुपयांची रोकड बॅगमध्ये भरून चारही जण दोन विना क्रमांकाच्या स्पोर्ट दुचाकींवरून पसार झाले. घटनेची माहिती मिळतातच पालकमंत्री गुलाबराव पाटील यांनी बँकेत जाऊन पाहणी करीत घटनेची माहिती
जाणून घेतली. तोंडाला चिकटपट्टी लावून ठेवले कोंडून
दरोड्याच्या घटनेवेळी बँकेत अधिकारी, कर्मचारी मिळून ६ जण आणि एक सुरक्षा रक्षक असे सात जण होते. दराडा टाकल्यानंतर संशयितांनी सर्वांच्या तोंडाला चिकटपट्टी लावून त्यांना एका खोलीत कोंडून ठेवले. ऐवज घेवून पळून जात असतांना ग्रामस्थांच्या लक्षात येताच त्यांनी बँकेत धाव घेत त्यांची सुटका करीत घटनेची माहिती तालुका पोलिसांना दिली.
गावात चादर विक्रीच्या बहाण्याने केली रेकी
दरोडा टाकण्यापुर्वी चार पैकी एका संशयिताने भोकर गावात चारद विक्रीच्या बाहण्याने येवून रेकी केली. गावातील रस्त्यांसह तेथे असलेल्या इतर माहिती समजल्यानंतर त्यांनी शनिवारी बँकेत सशस्त्र दरोडा टाकला. त्यांच्याजवळ असलेल्या एअरगनचा धाक दाखवित त्यांनी चार दरोडेखोरांपैकी २ जणांनी मॅनेजर आणि कॅशियर यांना बंदुकीचा धाक दाखवत लॉकर उघडण्यास सांगितले. त्यावेळी १६ लॉकर उघडून त्यातील सोने व जवळपास १५ लाख रुपयांची रोकड बॅगांमध्ये भरून ते बँकेबाहेर पडले व दोन दुचाकीवरून पसार झाले.
दरोड्याचा मुख्य सूत्रधार बडतर्फ उपनिरीक्षक भोकर येथील दरोड्याच्या गुन्ह्याचा मुख्य सूत्रधार
हा पोलीस दलातून बडतर्फे पोलिस उपनिरीक्षक शंकर जासक हा असल्याचा पोलिसांना संशय आहे. मुंबई येथे कार्यरत असतांना त्याच्यावर लाचलुचपत प्रतिबंधक विभागाने कारवाई केली होती. या कालावधीत तो आर्थीक विवंचनेत असल्यामुळे त्याने सन २०२३ मध्ये शालकाच्या मदतीने शनिपेठ पोलिस ठाण्याच्या हद्दीतील स्टेट बँकेत दरोडा टाकून ३.१७ कोटी रुपयांचा ऐवज चोरुन नेला होता. त्या गुन्ह्यात तो जिल्हा कारागृहात होता. जामीनावर बाहेर आल्यानंतर त्याने पुन्हा स्टेट बँकेत दरोडा टाकून कोट्यावधी रुपयांचा ऐवज लुटला. मात्र पोलिसांच्या प्रसंगावधानतेमुळे तो काही वेळताच जेरबंद झाल्याने त्याचा हा प्रयत्न देखील फसला.
ट्रॅक्टर आडवे लावून दरोडेखोरांना रोखले
दरोड्याची माहिती मिळताच ग्रामस्थांनी दुचाकीवरून चोरट्यांचा पाठलाग करण्यास सुरुवात केली. सुरुवातीला किनोदजवळ एका चोराला टामी मारली, मात्र ती त्याने चुकविली, त्यानंतर रिघूरजवळही रोखण्याचा प्रयत्न केला. अखेर डिकसाईजवळ रस्त्यावर ट्रॅक्टर आडवे लागल्याने चोरटा शेतात घुसला आणि तेथे ग्रामस्थांच्या तावडीत सापडला. घटनेची माहिती मिळताच स्थानिक गुन्हे शाखेचे पोलिस निरीक्षक राहुल गायकवाड, तालुका पोलिस ठाण्याचे पोलिस निरीक्षक शशिकांत पाटील हे घटनास्थळी पोहोचले. या घटनेसंदर्भात जिल्हाभरातील पोलिस यंत्रणेला अॅलर्ट करण्यात आले होते.
