धरणगाव (प्रतिनिधी) – शहरासह तालुक्यात गेल्या काही दिवसांपासून चोरट्यांनी धुमाकूळ घालत चोऱ्यांचे सत्र सुरूच ठेवले आहे. मात्र, हेडगेवार नगरात घरफोडी करणाऱ्या तीन सराईत चोरांचा डाव कारवाईमुळे पूर्णपणे उधळला गेला. एका चोराला घटनास्थळीच रंगेहाथ पकडून, अवघ्या दोन तासांत एरंडोलमध्ये पहाटे साडेचार वाजता छापा टाकण्यात आला. याठिकाणी उर्वरित दोघांच्या मुसक्या आवळण्यात पोलिसांना यश आले आहे.
हेडगेवार नगरातील रहिवासी आकाश तायडे यांच्या घरात मध्यरात्री २ वाजेच्या सुमारास तिघे चोरटे आत शिरले. त्यांनी घरातून सुमारे ३० हजार ५०० रुपये किमतीचे सोन्या-चांदीचे दागिने लंपास केले. मात्र, मध्यरात्री घराभोवती होणाऱ्या संशयास्पद हालचाली स्थानिक नागरिकांच्या नजरेस पडल्या. आधीच चोऱ्यांच्या सत्राने धास्तावलेल्या नागरिकांना तत्काळ चोरीचा संशय आला आणि त्यांनी आरडाओरडा केला. याचवेळी परिसरात पो.नि. उमाकांत गायकवाड यांच्या मार्गदर्शनात पोलिस कर्मचारी व होमगार्डचे पथक रात्री गस्तीवर तैनात होते. नागरिकांचा आरडाओरडा ऐकताच क्षणाचाही विलंब न लावता पोलिस घटनास्थळी दाखल झाले. पोलिस आणि नागरिकांना अचानक समोर पाहून चोरांची प्रचंड भंबेरी उडाली. तिघांपैकी दोघांनी अंधाराचा फायदा घेत रस्त्यावर उभी असलेली दुचाकी सुसाट वेगाने पळवून नेली. मात्र, एका चोराला पोलिस, होमगार्ड आणि नागरिकांनी पाठलाग करून जेरबंद केले. संशयिताची पोलिसांनी चौकशी केली असता, त्याने त्याचे साथीदार एरंडोलच्या दिशेने पळाल्याचे सांगितले.
त्यानंतर पोलिसांनी रात्रीच थेट एरंडोल गाठले. पहाटे साडेचार वाजेच्या सुमारास एरंडोल शहरात गुप्तपणे व अतिशय वेगाने छापा टाकून दुचाकीवरून पसार झालेल्या दोन्ही चोरांनाही शिताफीने ताब्यात घेतले. या कारवाईत पोलिसांनी शेख शकीब दाऊद (एरंडोल), अश्पाक शेख मुश्ताक एक (धुळे) आणि इमरान शेख फिरोज (एरंडोल) या तिघांना पोलिसांनी अटक केली आहे. त्यांच्याकडून चोरीस गेलेला ३० हजार ५०० रुपयांचा ऐवज हस्तगत करण्यात आला आहे. ही कामगिरी पो. हे. कॉ नितीन पाटील, पो.कॉ. सुमित बाविस्कर, राहुल निकम, सुदाम पाटील तसेच होमगार्ड निखिल चौधरी, सुदर्शन पाटील, अजय बडगुजर, विजय रोकडे, अमर मराठे, राहुल महाजन, स्वप्निल बडगुजर आणि निंबा धनगर यांच्या पथकाने केली.
