यावल (प्रतिनिधी) – तालुक्यातील किनगाव येथे विजया दशमीनिमित्त रविवारी राष्ट्रीय स्वंयसेवक संघाचे पथसंचलन होते. या पथसंचलनास एका धार्मिक स्थळासमोरून नेण्यास विरोधावरून पोलिसांवर झालेल्या दगडफेकीत तब्बल १०० हुन अधिक जणांवर गुन्हा दाखल केला आहे. त्यातील १६ जणांना अटक करण्यात आली असून या सर्वांना सोमवारी यावल न्यायालयात हजर केले असता त्यांना ३१ ऑक्टोंबरपर्यंत पोलिस कोठडी सुनावण्यात आली. तर गावात चोख पोलिस बंदोबस्त लावला असून डीवायएसपी तळ ठोकून आहेत.
किनगाव येथील चुंचाळे रोडावरील एका धार्मिक स्थळासमोरून राष्ट्रीय स्वयंसेवक संघाच्या पथसंचलनास विरोध दर्शवतांना रस्ता अडवण्यात आला होता. तर, या समुदायास बळाचा वापर करून रस्त्यावरून हटवतांना झालेल्या दगडफेकीत एका पोलिस उपनिरिक्षकासह ७ जण जखमी झाले होते. या प्रकरणी यावल पोलिस ठाण्यात पोलिस उपनिरिक्षक अनिल महाजन यांच्या फिर्यादीवरून १०० हुन अधिक जणाविरूध्द गुन्हा दाखल करण्यात आला आहे. तर हारुण नसिर पिंजारी, अक्षय संतोष साळुंखे, भूषण शिवाजी साळुंखे, इरफान खान शेर खान, आजिम शेख कलिम, अल्ताफ कडषू पिंजारी, कलीम शकील पिंजारी, आसीफ मुस्ताक खाटीक, समीर खान शकील खान, वसीम खान अयूब खान, रियाज राजू तडवी, रिहान इकबाल फकीर, समीर खान युनूस खान, शेख जावीद शेख कलीम, इम्रान फारुख बागवान, रहीम शहा रमजान शहा फकीर या १६ जणांना अटक करण्यात आली आहे. या सर्वांना सोमवारी यावल येथील न्यायालयात प्रथमवर्ग न्यायधीश आर. एस. जगताप यांच्या समोर हजर केले असता या सर्वांना ५ दिवसाची पोलिस कोठडी सुनावण्यात आली. तपास पोलिस निरिक्षक रंगनाथ धारबळे यांच्या मार्गदर्शनात सपोनि अजयकुमार वाढवे करत आहेत.
