जळगाव (प्रतिनिधी) – महावितरणच्या २०२६-२७ मधील राज्यस्तरीय क्रीडा स्पर्धेसाठी जळगाव-नाशिक परिमंडलाचा संघ शनिवारी (२४ ऑक्टोबर) निवडण्यात आला. यासाठी झालेल्या निवड चाचणीत चारशेहून अधिक कर्मचाऱ्यांनी सहभाग घेतला. त्यातील १६० कर्मचाऱ्यांची कोल्हापूर येथे नोव्हेंबरमध्ये होणाऱ्या स्पर्धेसाठी निवड करण्यात आली.
धुळे येथील जिल्हा क्रीडा संकुलाच्या मैदानावर कोकण प्रादेशिक कार्यालयाचे सहव्यवस्थापकीय संचालक श्री.दिलीप जगदाळे यांच्या हस्ते निवड चाचणी स्पर्धांचे उद्‍घाटन झाले. यावेळी जळगाव परिमंडलाचे मुख्य अभियंता श्री.आय. ए. मुलाणी, नाशिक येथील नेटवर्क प्लॅनिंग सेलचे मुख्य अभियंता श्री.पवनकुमार कछोट, धुळे मंडलाचे अधीक्षक अभियंता श्री.संजय सरग यांची प्रमुख उपस्थिती होती.
यावेळी सहव्यवस्थापकीय संचालक श्री. दिलीप जगदाळे म्हणाले की, क्रीडा स्पर्धांमुळे कर्मचाऱ्यांमध्ये संघभावना, शिस्त आणि खिलाडूवृत्ती विकसित होते. दैनंदिन कामाच्या धावपळीत अशा स्पर्धा कर्मचाऱ्यांना शारीरिक व मानसिक तंदुरुस्ती राखण्यासाठी आणि नव्या ऊर्जेने कार्यरत राहण्यासाठी प्रेरणा देतात. मुख्य अभियंता श्री. आय. ए. मुलाणी म्हणाले की, महावितरणच्या कर्मचाऱ्यांनी वीजसेवेचे कर्तव्य बजावताना आपल्या आरोग्याचीही काळजी घेणे आवश्यक आहे. क्रीडा स्पर्धांमुळे कर्मचाऱ्यांमधील सुप्त गुणांना वाव मिळतो, परस्परांतील स्नेह वाढतो आणि सांघिक कार्यक्षमता अधिक बळकट होते.
निवड चाचणीस नाशिक परिमंडलाचे उपमुख्य औद्योगिक संबंध अधिकारी श्री.विश्वास पाटील, नाशिक परिमंडलाचे जनसंपर्क अधिकारी श्री.विकास आढे, जळगाव परिमंडलाचे उपमुख्य औद्योगिक संबंध अधिकारी श्री.अरुण शेलकर, जळगावचे वरिष्ठ व्यवस्थापक श्री.अमित सोनवणे, धुळे मंडलाचे कार्यकारी अभियंते श्री.प्रताप मचिये, श्री.जितेंद्र महाजन, श्री.प्रीतम काळे, श्री.भाऊसाहेब पाटील, व्यवस्थापक श्री.नरेश प्रसाद, श्री.अक्षय पाडसवान यांच्यासह इतर अधिकारी व क्रीडा नियोजन समितीतील सदस्य मोठ्या संख्येने उपस्थित होते.
यावेळी कबड्डी, खो-खो, व्हॉलीबॉल, बॅडमिंटन, टेबल टेनिस, बुद्धिबळ, कॅरम, टेनिकॉइट, ब्रीज, कुस्ती, धावणे (१०० मीटर, २०० मीटर, ४०० मीटर, ८०० मीटर, १५०० मीटर, ५००० मीटर), ४ बाय १०० मीटर रिले, उंच उडी, लांब उडी, गोळा फेक, थाळी फेक व भाला फेक, क्रिकेट आदी इनडोअर आणि आऊटडोअर स्वरूपातील वैयक्तिक व सांघिक अशा २५ क्रीडा प्रकारांची चाचणी घेण्यात आली. सर्व क्रीडा प्रकारांच्या चाचणी चारशेहून अधिक कर्मचारी सहभागी झाले. त्यातून १६० पुरुष व महिला कर्मचाऱ्यांची स्पर्धेसाठी निवड करण्यात आली.
