धरणगाव (प्रतिनिधी) – शहरातील जी.एस. नगर परिसरातील मंगल कार्यालयाच्या मागे, नगरपालिका हद्दीतील गट क्रमांक ४७५ मधील कृष्ण-गीता नगर येथे मध्यरात्रीच्या सुमारास चोरट्यांनी घरफोडी केली. खर्दे माध्यमिक विद्यालयाचे सेवानिवृत्त सेवक तथा कृष्ण-गीता नगर कॉलनीचे अध्यक्ष बी. एम. सैंदाणे यांच्या घराला चोरट्यांनी लक्ष्य केले. या घटनेत पाच संशयित चोरटे सीसीटीव्ही कॅमेऱ्यात कैद झाल्याची माहिती असून, सुदैवाने घरातून कोणतीही रोकड अथवा दागिने चोरीला गेले नाहीत. मात्र, या घटनेमुळे परिसरातील नागरिकांमध्ये भीतीचे वातावरण निर्माण झाले आहे. याबाबत मिळालेल्या माहितीनुसार, मध्यरात्री १ वाजून १८ मिनिटांच्या सुमारास ही घरफोडी झाली. हे सीसीटीव्ही कॅमेरा पाहिल्यानंतर निदर्शनास आले.
दरम्यान, प्रभागाचे नगरसेवक किरण अग्नीहोत्री यांनी रात्री २ वाजून ४० मिनिटांनी कृष्ण-गीता नगरमधील रहिवाशांना फोन करून मातोश्री नगर परिसरात काही संशयित व्यक्ती दिसल्याची माहिती दिली. तसेच नागरिकांनी सावध व सतर्क राहावे, असे आवाहन केले. ही माहिती मिळताच कॉलनीतील रहिवासी पी.डी. पाटील व एस.एन. कोळी यांनी तातडीने इतर सदस्यांना फोन करून सतर्क राहण्यास सांगितले याचदरम्यान पंकज मिस्तरी यांनी खिडकीतून बाहेर पाहिले असता, बी. एम. सैंदाणे यांच्या घरासमोरील लोखंडी गेट उघडे असल्याचे त्यांच्या निदर्शनास आले. संशय बळावल्याने कॉलनीचे सदस्य पी.डी. पाटील यांनी तातडीने धरणगाव पोलीस ठाण्याशी संपर्क साधला. माहिती मिळताच अवघ्या पाच मिनिटांत, म्हणजेच पहाटे ३ वाजेच्या सुमारास पोलीस वाहन घटनास्थळी दाखल झाले. पोलिस व होमगार्ड यांनी घटनास्थळाची पाहणी करून घरात प्रवेश केला असता, कपाटांचे ड्रॉवर उघडे असल्याचे तसेच कपडे व साड्या अस्ताव्यस्त पडलेल्या असल्याचे दिसून आले. सुदैवाने घरातील रोकड किंवा दागिने चोरीला गेले नसल्याचे समोर आले.
घटनेची माहिती मिळताच कॉलनीतील नागरिकांनी रात्रीच्या वेळी लाठ्या-काठ्या घेऊन बाहेर पडत परिसरात सतर्कता दाखवली. सीसीटीव्ही कॅमेऱ्यात पाच संशयित चोरट्यांचे चेहरे कैद झाल्याने या फुटेजच्या आधारे चोरट्यांचा शोध घेण्यास मदत होण्याची अपेक्षा व्यक्त केली जात आहे. या वेळी पोलीस कर्मचारी व होमगार्ड यांच्यासह कॉलनीचे उपाध्यक्ष विनायक न्हावी, सचिव महेंद्र सैनी, एस. एन. कोळी, जे. एस. पवार, ज्ञानेश्वर पवार, गोकुळ महाजन, महेंद्र बिवाल, चंदन बिवाल, प्रल्हाद विसपुते, बाळू अत्तरदे, भरत पाटील तसेच कॉलनीतील अनेक नागरिक उपस्थित होते. या घरफोडीच्या घटनेमुळे कृष्ण-गीता नगर परिसरातील नागरिकांमध्ये चिंतेचे वातावरण असून, रात्रीच्या वेळी पोलिसांनी गस्त वाढवावी आणि संशयितांचा लवकरात लवकर शोध घ्यावा, अशी अपेक्षा नागरिकांकडून व्यक्त होत आहे.
