मुंबई (वृत्तसंस्था) कोरोना रुग्णांची संख्या वाढत असून रुग्णालयात बेड, ऑक्सिजन, औषध, लसी यांचा तुटवडा जाणवू लागला आहे. परंतु या प्रतिकूल परिस्थितीचा देशातील ९० टक्के डॉक्टर्स गैरफायदा घेत आहेत असा आरोप प्रसिद्ध स्टँडअप कॉमेडियन आणि अभिनेता सुनील पाल यानं केला होता. हे डॉक्टर्स देवदूत नाहीत राक्षस आहेत असं तो म्हणाला होता. या वादग्रस्त विधानामुळं आता त्याच्याविरोधात पोलीस ठाण्यात गुन्हा दाखल करण्यात आला आहे.
कोरोना काळात रुग्णसेवेसाठी वाहून देणाऱ्या डॉक्टरांची तुलना राक्षसांशी करणं स्टँड अप कॉमेडियन सुनील पाल यांच्या अंगलट येण्याची शक्यता आहे. सुनील पाल यांच्याविरोधात मुंबईतील अंधेरी पोलिस ठाण्यात गुन्हा दाखल करण्यात आला आहे. डॉक्टरांच्या विरोधात आक्षेपार्ह टिप्पणी केल्याप्रकरणी गुन्हा नोंदवण्यात आला आहे. फ्रंटलाइन कर्मचारी कोरोना साथरोगाच्या काळात दिवसरात्र लोकांची मदत करण्यात गुंतले आहेत. डॉक्टर रुग्णांचा जीव वाचवण्याचा प्रयत्न करत आहेत. अशातच स्टँड अप कॉमेडियन सुनील पाल यांनी सोशल मीडियावर एक व्हिडीओ शेअर केला. ज्यामध्ये त्यांनी डॉक्टरांना चोर आणि हैवान म्हटले आहे. त्यामुळे सुनील पाल यांच्या अडचणी वाढल्या आहेत. डॉक्टरांविरोधात आक्षेपार्ह शब्द वापरल्याबद्दल एफआयआर दाखल करण्यात आला आहे.
असोसिएट ऑफ मेडिकल कन्सल्टंट्सच्या अध्यक्षा डॉक्टर सुष्मिता भटनागर यांनी ही तक्रार दाखल केली आहे. डॉ. सुधीर नाईक यांनी सांगितले की, डॉ. भटनागर यांनी २० एप्रिल रोजी पहिल्यांदा हा व्हिडिओ पाहिला होता.
काही दिवसांपूर्वी सुनीलनं एक व्हिडीओ सोशल मीडियावर शेअर केला होता. या व्हिडीओद्वारे त्यानं देशातील सद्य परिस्थितीवर भाष्य केलं होतं. शिवाय डॉक्टरांवर गंभीर आरोप देखील केले होते. तो म्हणाला होता, “डॉक्टर हे देवाचे रुप असतात, परंतु यावेळी ९० टक्के डॉक्टरांनी राक्षसाचे रुप धारण केले आहे. ते फसवणूक करत आहेत. कोविड बाधित असल्याचं सांगून लोकांना रुग्णालयात दाखल केले जात आहे, त्यांच्याकडून बिले आकारली जात आहेत. इतकंच नाही तर त्यांच्या मृत्यूनंतर शरीरातून अनेक अवयवही काढून टाकले जात आहेत” असं व्हिडीओमध्ये सुनील पाल म्हणाले होते.
