
नाशिक, (प्रतिनिधी) : शहरात पार्क केलेल्या कार फोडून चोरी करण्याच्या घटनांमध्ये चोरट्यांनी पुन्हा डोके वर काढले आहे. बुधवारी (दि. १८) शहरातील दोन वेगवेगळ्या ठिकाणी कारच्या काचा फोडून चोरट्यांनी रोकड, लॅपटॉप आणि महत्त्वाची कागदपत्रे असा हजारोंचा ऐवज लंपास केला. या घटनांमुळे वाहनधारकांमध्ये चिंतेचे वातावरण असून, याप्रकरणी मुंबईनाका आणि सरकारवाडा पोलीस ठाण्यात गुन्हे दाखल करण्यात आले आहेत.
पहिली घटना श्री हरी कुटे मार्गावरील क्रिकेट टर्फसमोर घडली. मुंबईतील पवई येथे राहणारे डॉ. विनायक गंगाधर निकम हे बुधवारी कामानिमित्त नाशिकमध्ये आले होते. दुपारी त्यांनी एमएच ०५ डीडी ००४० क्रमांकाची इनोव्हा कार क्रिकेट टर्फसमोर पार्क केली आणि जेवणासाठी गोकूळ हॉटेलमध्ये गेले. याच संधीचा फायदा घेत अज्ञात चोरट्यांनी कारची काच फोडून आतील लेदर बॅग चोरून नेली. बॅगेत रोकड, ॲपल मोबाईलचा चार्जर, बँकेचे एटीएम कार्ड आणि महत्त्वाची कागदपत्रे असा सुमारे १२ हजार रुपयांचा ऐवज होता. याप्रकरणी मुंबईनाका पोलिसांत गुन्हा दाखल करण्यात आला आहे.
दुसरी चोरी त्र्यंबकनाका परिसरात घडली. अमरावती जिल्ह्यातील वलगाव येथे राहणारे श्याम मोहन कलंत्री हे व्यावसायिक कामानिमित्त नाशिकमध्ये आले होते. त्यांच्या कारमधून अज्ञात चोरट्यांनी लॅपटॉप आणि महत्त्वाची कागदपत्रे असा सुमारे ३२ हजार रुपयांचा ऐवज चोरून नेला. या प्रकरणी सरकारवाडा पोलीस ठाण्यात गुन्हा दाखल करण्यात आला आहे.
शहरात एकाच दिवशी दोन ठिकाणी कारच्या काचा फोडून चोरी झाल्याने पार्किंगमध्ये वाहने उभी करताना नागरिकांनी सावध राहण्याची गरज अधोरेखित झाली आहे. पोलिसांकडून या दोन्ही घटनांचा तपास सुरू आहे.
















