
जळगाव, प्रतिनिधी : कमरेला पिस्तुल लावून दहशत माजविणाऱ्या परमेश्वर गजानन बांबर्डे (रा. गोपाळपुरा, जुने जळगाव) याच्या शनिपेठ पोलिसांनी मुसक्या आवळल्या. त्याच्याकडून गावठी पिस्तुलसह एक जीवंत काडतूस हस्तगत करण्यात आले असून त्याच्याविरुद्ध गुन्हा दाखल करण्यात आला आहे.
शहरातील रथ चौकात एक जण कमरेला पिस्तुल लावून दहशत माजवित असल्याची माहिती दि. १८ रोजी शनिपेठ पोलिसांना मिळाली. त्यानुसार प्रभारी पोनि सागर शिंपी यांनी सपोनि सुनिल कदम, परि. उपनिरीक्षक संतोष खेडकर, अभिषेक कटारे, पोहेकॉ विजय खैरे, योगेश जाधव, अनिल साळुंखे, युवराज कोळी, अजय निकम, नवजीत चौधरी, सतिष भारुळे, निलेश घुगे यांचे पथक रवाना केले. या पथकाने रथ चौकात संशयास्पदित्या फिरणाऱ्या परमेश्वर बांबर्डे याला ताब्यात घेतले. त्याची कसून चौकशी केल्यानंतर त्याच्या कमरेला गावठी पिस्तुल मिळून आले. पोलिसांनी संशयिताला ताब्यात घेतले असून त्याच्याविरुद्ध गुन्हा दाखल केला आहे.















