
जळगाव/धुळे/नंदुरबार (प्रतिनिधी) – कायमस्वरूपी तसेच तात्पुरता वीजपुरवठा खंडित झालेल्या उच्चदाब व लघुदाब ग्राहकांसाठी महावितरणतर्फे ‘अभय योजना २०२६-२७’ जाहीर करण्यात आली आहे. या योजनेचा लाभ जळगाव परिमंडलातील तब्बल ३ लाख ९२ हजार २५५ थकबाकीदार ग्राहकांना घेता येणार आहे. ग्राहकांना थकबाकीमुक्त होण्याची ही मोठी संधी असून, पात्र ग्राहकांनी योजनेचा लाभ घेऊन थकबाकीचा प्रश्न कायमस्वरूपी निकाली काढावा, असे आवाहन मुख्य अभियंता आय.ए. मुलाणी यांनी केले आहे.
अभय योजना ६ नोव्हेंबर २०२६ ते १५ जानेवारी २०२७ या कालावधीत लागू राहणार आहे. ३१ मार्च २०२६ पर्यंत कायमस्वरूपी वीजपुरवठा खंडित झालेले घरगुती, व्यावसायिक, औद्योगिक व इतर बिगरकृषी ग्राहक तसेच ३१ डिसेंबर २०२५ पर्यंत तात्पुरता वीजपुरवठा खंडित झालेले ग्राहक या योजनेसाठी पात्र आहेत. शेती व सार्वजनिक नळ पाणीपुरवठा योजनांना या योजनेतून वगळण्यात आले आहे.
या योजनेअंतर्गत ग्राहकांच्या एकूण थकबाकीवरील संपूर्ण व्याज आणि विलंब आकार शंभर टक्के माफ करण्यात येणार आहे. याशिवाय, उर्वरित मूळ थकबाकीचा एकरकमी भरणा केल्यास त्यामध्ये आणखी १० ते २० टक्क्यांपर्यंत सवलत मिळणार आहे. तसेच थकबाकी हप्त्यांमध्ये भरण्याची सुविधा उपलब्ध करून देण्यात आली आहे. लघुदाब ग्राहकांना ५० टक्के डाउन पेमेंट भरून उर्वरित रक्कम सहा समान व्याजमुक्त मासिक हप्त्यांमध्ये भरता येईल, तर उच्चदाब ग्राहकांसाठी तीन ते सहा हप्त्यांची सुविधा उपलब्ध आहे. तसेच, २० किलोवॉटपर्यंत मंजूर भार असलेल्या ग्राहकांनी वीजपुरवठा पुनर्जोडणीच्या वेळी प्रीपेड मीटरचा पर्याय निवडल्यास मूळ थकबाकीमध्ये अतिरिक्त पाच टक्के सवलत मिळणार आहे. अशा ग्राहकांचे पुनर्जोडणी शुल्क आणि सर्व्हिस कनेक्शन शुल्क पूर्णपणे माफ करण्यात येणार आहे.
जळगाव परिमंडलात कायमस्वरूपी व तात्पुरता वीजपुरवठा खंडित असलेल्या पात्र ग्राहकांकडे सुमारे २९० कोटी ८८ लाख रुपयांची मूळ थकबाकी आहे. या ग्राहकांना सुमारे ६३ कोटी ६६ लाख रुपयांचे व्याज व विलंब आकार पूर्णपणे माफ होणार आहे. याशिवाय, मूळ थकबाकीच्या एकरकमी भरण्यावर १० ते २० टक्क्यांपर्यंत सवलत मिळणार असल्याने ग्राहकांना मोठा आर्थिक दिलासा मिळणार आहे. जिल्हानिहाय आकडेवारीनुसार, जळगाव जिल्ह्यातील १ लाख ९८ हजार ९६० ग्राहकांकडे १७१ कोटी ३५ लाख रुपयांची मूळ थकबाकी आहे. या ग्राहकांना ४६ कोटी ३३ लाख रुपये विलंब आकार व व्याज माफ होणार आहे. धुळे जिल्ह्यातील ९१ हजार ४६० ग्राहकांकडे ५७ कोटी ६७ लाख रुपयांची मूळ थकबाकी असून, त्यांना ८ कोटी ७४ लाख रुपये व्याज व विलंब आकारातून शंभर टक्के सवलत मिळणार आहे. तर नंदुरबार जिल्ह्यातील १ लाख १ हजार ८३५ हजार ग्राहकांकडे ६१ कोटी ८६ लाख रुपयांची मूळ थकबाकी आहे. या ग्राहकांना ८ कोटी ५९ लाख रुपये व्याज व विलंब आकार माफ होणार आहे.
‘अभय योजना २०२६-२७’मध्ये सहभागी होण्यासाठी अर्ज प्रक्रिया अत्यंत सुलभ आणि ऑनलाइन ठेवण्यात आली आहे. ग्राहकांना महावितरणच्या अधिकृत ऑनलाइन पोर्टलवरून किंवा मोबाईल ॲपद्वारे योजनेसाठी अर्ज करता येणार आहे. थकबाकीदार ग्राहकांनी या सुवर्णसंधीचा लाभ घेऊन व्याज व विलंब आकाराच्या मोठ्या आर्थिक सवलतीचा फायदा घ्यावा आणि थकबाकीमुक्त व्हावे, असे आवाहन महावितरणतर्फे करण्यात आले आहे.
















