यावल (प्रतिनिधी) भुसावळ येथील व्यापाऱ्याने चोपडा येथील व्यापाऱ्याला दिलेले उसनवारीचे २४ लाख रुपये घेऊन येणाऱ्या नोकराची यावल ते चोपडा रस्त्यावरील चुंचाळे फाट्याजवळ दुचाकी समोरून येणाऱ्या सी.डी.-१०० दुचाकीवरील २० ते २२ वयोगटातील दोन अज्ञात तरुणांनी अडवली. तसेच चाकूचा धाक दाखवून नोकराकडील २४ लाखांची बॅग हिसकावून पोबारा केल्याची घटना रविवारी दुपारी घडली. या घटनेने तालुक्यात खळबळ उडाली आहे.
भुसावळ येथील प्रभात कॉलनीतील रहिवासी किरण प्रभाकर पाटील (वय ५३) यांनी या संदर्भात फिर्याद दिली आहे. त्यानुसार भुसावळ येथील राजेश पारीख या व्यावसायिकाकडे किरण पाटील खासगी नोकरी करतात. तर पारीख यांनी चोपडा येथील व्यापाऱ्यांना दिलेले उसनवारीचे पैसे परत घेऊन येण्याचे सांगितले होते. त्यानुसार किरण पाटील हे त्यांची सीडी-१०० दुचाकी (एमएच १९, डीडब्ल्यू ०५४७) ने चोपडा येथे गेले. चोपडा येथील महालक्ष्मी स्टील या दुकानदाराकडून ९ लाख ५० हजार, चामुंडा स्टीलच्या दुकानातून ११ लाख व महाराष्ट्र स्टील या दुकानातून साडेतीन लाख असे एकुण २४ लाखांची रोकड बॅगमध्ये ठेवून दुपारी पावणेतीन वाजेच्या सुमारास ते यावलकडे येण्यास निघाले. दरम्यान, दुपारी ३.३० वाजेच्या सुमारास चोपडा ते यावल रस्त्यावरील चुंचाळे ते साकळी दरम्यान चुंचाळे फाट्यापुढे सुमारे १०० मीटर अंतरावर समोरून एक सी.डी.-१०० दुचाकी विरुद्ध दिशेने आली. तर समोरच्या दुचाकीमुळे अपघात होऊ नये म्हणून किरण पाटील यांनी दुचाकी थांबवली. त्याचवेळी दुसऱ्या दुचाकीवरील २० ते २३ वयोगटातील दोघा तरूणांनी पाटील यांच्या पाठीवर लटकवलेली पैशांची बॅग जबरदस्तीने धमकी देऊन हिसकावण्याचा प्रयत्न केला. किरण पाटील यांनी विरोध केल्यानंतर त्यातील एकाने पॅटच्या खिशातून चाकू काढून तुझे जानसे मार ढुंगा, चल बॅग दे, असे म्हणत त्यांनी बॅग हिसकावून घेतली. तसेच त्यांच्या खिशातील सॅमसंग कंपनीचा मोबाईल व त्यांच्या दुचाकीची चावी घेवून ते दोघे यावलच्या दिशेने दुचाकीने पसार झाले. थोड्या वेळाने मागून येणाऱ्या दुचाकीस्वाराने पाटील यांची दुचाकी सुरू करुन दिली. तर या घटनेची माहिती किरण पाटील यांनी त्यांचे मालक राजेश पारीख यांना कळवली. दरम्यान, पारीख हे यावल आल्यावर त्यांना पाटील यांनी सर्व घटना सांगितली. त्यानंतर यावल पोलीस ठाण्यात फिर्याद देण्यासाठी धाव घेतली. या प्रकरणी यावल पोलिसांत दोन अज्ञात चोरट्यांविरुद्ध गुन्हा दाखल करण्यात आला आहे.
वरिष्ठ अधिकाऱ्यांची घटनास्थळी धाव
घटनेचे वृत्त कळताच पोलीस निरीक्षक रंगनाथ धारबळे, डीवायएसपी अनिल बडगुजर हे घटनास्थळी पथकासह रवाना झाले. तसेच ज्या दिशेने चोरटे पसार झाले, त्या दिशेने पोलीस पथक मागावर पाठवले. मात्र चोरटे आढळले नाहीत.
