चाळीसगाव (प्रतिनिधी) भारताला संविधानाची भेट देणारे विश्वभूषण डॉ बाबासाहेब आंबेडकर यांची १३२ वी जयंती संपूर्ण तालुक्यात सर्व समाजघटकांना सोबत घेऊन व्यापक प्रमाणात साजरी व्हावी यासाठी आमदार मंगेशदादा चव्हाण यांच्या अध्यक्षतेखाली तालुकास्तरीय सार्वजनिक जयंती उत्सव समिती गठीत करण्यात आली आहे.
या समितीच्या माध्यमातून सुप्रसिद्ध गायक आनंद शिंदे यांचा भीमगीते व सदाबहार गीतांचा कार्यक्रम बुधवार दि.१२ एप्रिल २०२३ रोजी संध्याकाळी ६ वाजता आयोजित करण्यात आला आहे. छत्रपती शिवाजी महाराज चौक मैदान, चाळीसगाव येथे होणाऱ्या या भव्य कार्यक्रमाच्या ठिकाणी डॉ.बाबासाहेब आंबेडकर यांच्या जीवनावर आधारित चित्रांचे प्रदर्शन देखील भरविण्यात येणार आहे. सदर कार्यक्रमाला राज्याचे ग्रामविकासमंत्री गिरीषभाऊ महाजन, पालकमंत्री गुलाबरावजी पाटील हे प्रमुख पाहुणे म्हणून उपस्थित राहणार असल्याची माहिती आयोजकांनी दिली आहे. तरी चाळीसगाव मतदारसंघातील जास्तीत जास्त नागरिकांनी या दोन्ही कार्यक्रमांना उपस्थित राहण्याचे आवाहन विश्वभूषण डॉ बाबासाहेब आंबेडकर तालुकास्तरीय सार्वजनिक जयंती उत्सव समितीच्या वतीने करण्यात आले आहे.
मानवतेच्या महानायकाला अभिवादन करण्यासाठी जास्तीत जास्त संख्येने उपस्थित रहा : आमदार मंगेश चव्हाण
चाळीसगाव मतदार संघात काम करतांना सर्वच जाती – धर्मांसह वेगवेगळ्या समुहांना सोबत घेऊन पुढे जात आहोत. प्रत्येक धर्माचा आदर करावा… हे तत्व भारतीय संविधानाचा गाभा आहे. डॉ. बाबासाहेब आंबेडकर यांच्या याच उर्जादायी स्मृती आणि विश्वव्यापी कार्याचं स्मरण करतांना ‘विश्वभूषण डॉ. बाबासाहेब आंबेडकर तालुकास्तरीय सार्वजनिक जयंती उत्सव समितीतर्फे’ ख्यातकिर्त, सुप्रसिद्ध गायक श्रीयुत आनंदजी शिंदे यांच्या भीम गीते व सदाबहार गीतांच्या कार्यक्रमाचं आयोजन केले आहे. या सर्वसमावेशक व श्रवणीय सोहळ्याला उपस्थित राहून मानवतेच्या महानायकाला अभिवादन करु या, असे आवाहन चाळीसगाव मतदारसंघाचे आमदार व तालुकास्तरीय जयंती उत्सव समिती अध्यक्ष मंगेशदादा चव्हाण यांनी केले आहे.
