पाळधी ता. धरणगाव (प्रतिनिधी) येथून जवळच असलेल्या बांभोरी गावापासून काही अंतरावर सोमवारी रात्री १२.३० वाजता नाशिक येथून काम आटोपून दुचाकीने घरी येत असताना एका तरुणाला अज्ञात वाहनाने उडविल्याने त्याचा जागीच मृत्यू झाला. गोकुळ रामदास बारी उर्फ फुसे (वय ३४, रा.शिरसोली प्र.न.) असे मयत तरुणाचे नाव आहे.
गोकुळ हा सीसीटीव्ही कॅमेरे व इतर इलेक्ट्रॉनिक्सचे कामे करीत होता. याच कामासाठी तो सोमवारी दुचाकीने (क्र. एम.एच १९, बी.टी १९८२) नाशिक येथे गेला होता. तेथून दोन वाजता घरी परत येण्यासाठी निघाला. बांभोरी गावाच्या अलीकडे रात्री साडेबारा वाजता अज्ञात वाहनाने धडक दिल्याने गोकुळ याच्या हेल्मेटसह डोक्याचा चेंदामेंदा झाला. त्यात त्याचा जागीच मृत्यू झाला. पाळधी दूरक्षेत्राच्या पोलिसांनी काही लोकांच्या मदतीने गोकुळ याला १ वाजता शासकीय वैद्यकिय महाविद्यालयात आणले असता डॉक्टरांनी मृत घोषीत केले. याप्रकरणी पाळधी पोलिसात अपघाताची नोंद करण्यात आली आहे.
