जळगाव (प्रतिनिधी) शहरातील रेल्वे स्टेशनच्या फलाट क्र. २ वर नवजीवन एक्स्प्रेसमधून पडल्याने एका प्रौढाचा गंभीर जखमी झाल्याने मृत्यू झाल्याची धक्कादायक घटना मंगळवारी २० ऑगस्ट रोजी सकाळी ८.३० वाजेच्या सुमारास घडली आहे. याप्रकरणी दुपारी १२ वाजता जळगाव रेल्वे पोलीस ठाण्यात अकस्मात मृत्यूची नोंद करण्यात आली आहे. शेख मेहमूद शेख समद (वय ५४, रा. मण्यार वाडा, कोळी पेठ, जळगाव), असे मयत प्रौढाचे नाव आहे.
जळगाव शहरातील कोळी पेठ येथे शेख मेहमूद शेख समद हे आपले आई, वडील, पत्नी, २ मुले आणि १ मुलगा यांच्यासह वास्तव्याला होते. भंगार विक्री करून तो परिवाराचा उदरनिर्वाह करीत होता. दरम्यान, शेख मेहमूद हे मंगळवारी २० ऑगस्ट रोजी सकाळी ८.३० वाजता जळगाव फलाट क्रमांक २ वर अपलाईवर नवजीवन एक्स्प्रेसमधून पडून गंभीर जखमी झाले. त्यांना पुढील उपचारासाठी शासकीय वैद्यकीय महाविद्यालय व रुग्णालयात दाखल केले असता तेथे वैद्यकीय अधिकाऱ्यांनी त्यांना मयत घोषित केले. यावेळी कुटुंबीयांनी एकच आक्रोश केला. यावेळी रेल्वे पोलीसांनी घटनास्थळी धाव घेवून पंचनामा केला. याप्रकरणी जळगाव रेल्वे पोलीस ठाण्यात अकस्मात मृत्यूची नोंद करण्यात आली आहे.
