जळगाव ( प्रतिनिधी ) : जिल्ह्यात अवकाळी पावसाने सोमवारी सायंकाळी जोरदार हजेरी लावत अनेक भागांत जनजीवन विस्कळीत केले.सायंकाळी साडेपाचच्या सुमारास जळगाव शहरासह तालुक्यातील आव्हाणे, भादली, ममुराबाद, असोदा येथे गारांचा वर्षाव झाला. तसेच पाळधीसह पाचोरा तालुक्यात गारपीटीने झोडपले.त्यामुळे काढणीला आलेल्या रब्बी पिकांचे मोठे नुकसान झाले आहे.
चाळीसगाव येथे सायंकाळी सहाच्या सुमारास विजांच्या कडकडाटासह जोरदार पाऊस आणि वेगवान वारे वाहत होते. पारोळा, बहादरपूर परिसरात सव्वापाचच्या सुमारास पावसाची सुरुवात झाली. अमळनेर, धरणगाव आणि जामनेर तालुक्यांतही सायंकाळच्या वेळेत मेघगर्जनेसह जोरदार पावसाची नोंद झाली. धरणगाव व पाचोरा तालुक्यातही काही ठिकाणी गारपीट झाली आहे. जामनेर तालुक्यातील नेरीसह लोहारा, बाळद, कजगाव परिसरातही वादळी पावसाने झोडपले.
रावेर तालुक्यातील तांदलवाडी परिसरात विजांच्या गडगडाटासह पाऊस झाला, तर काही ठिकाणी वाऱ्याचा वेग तुलनेने कमी होता. शेंदुर्णी परिसरातही पावसाची नोंद झाली आहे.या अवकाळी पावसामुळे शेती पिकांचे नुकसान झाल्याची प्राथमिक माहिती समोर येत आहे. काही ठिकाणी वादळीवाऱ्यामुळे झाडे व विजेचे खांब कोसळल्याच्या घटना घडल्या आहेत. काही ठिकाणी वीजपुरवठा खंडित झाला होता. जिल्ह्यात सकाळी कडक उन्ह होते. मात्र, दुपारी तीननंतर हवामानात अचानक बदल होऊन ढगाळ वातावरण तयार झाले. जळगाव शहरात सायंकाळी पाचला जोरदार पाऊस झाला. सुरवातील काही मिनिटे गारांचा पाऊस पडल्यामुळे नागरिकांची गोंधळ उडाला. अचानक झालेल्या गारांसह पावसामुळे मोटारसायकल घसरल्याच्या घटना घडल्या. पावसामुळे हवेत गारवा निर्माण झाल्याने नागरिकांना उकाळ्यापासून दिलासा मिळाला.
मका, ज्वारीचे मोठे नुकसान
पारोळा, पाचोरा, चाळीसगाव तालुक्यात वादळामुळे ज्वारी व मका उत्पादकांसमोर अडचण निर्माण झाली आहे. वादळामुळे काढणीला आलेले बहुतांशी पिके आडवी झाल्याने उत्पादक घट होणार असून, काढणीचा खर्च वाढणार असल्यामुळे शेतकरी अडचणी आला आहे. आज पुन्हा अवकाळी पावसाच्या अंदाजामुळे जिल्ह्यातील शेतकरी धास्तावले आहेत.
आजही पावसासह गारपीटचा इशारा
हवामान विभागाने पुढील दोन दिवस मेघगर्जनेसह पाऊस, गारपीट आणि ताशी ५० ते ६० किमी वेगाने वारे वाहण्याचा इशारा दिला आहे. मंगळवारी पावसाचे प्रमाण तुलनेने कमी राहण्याची शक्यता असली तरी ढगाळ वातावरण कायम राहणार असून काही ठिकाणी विजांच्या कडकडाटासह पाऊस पडू शकतो. तसेच १ ते ४ एप्रिल दरम्यानही पावसाचा अंदाज असल्याने दुपारनंतर पावसासह काही ठिकाणी गारपिटीसाठी पोषक परिस्थिती निर्माण होण्याची शक्यता आहे.
