जळगाव (प्रतिनिधी) वडील मोलमजुरी काम करुन कुटुंबाचा गाडा हाकत असल्याने मुलाने पोलिस होण्याचे स्वप्न उराशी बाळगले होते. दिवसभराच्या कामातून वेळ काढून तो पोलीस भरतीची तयारी करीत होता. मात्र मित्रांसोबत सिहोरला जात असतांना काळाने सुरजवर झडप घालून त्याला हिरावून घेतल्याची दुर्देवी घटना खंडवा ते सेंधवादरम्यान, महामार्गावर घडली. कारचे टायर फुटून झालेल्या अपघातात सुरज रामेश्वर जोमाळकर (वय २४, रा. तुकाराम वाडी) असे मयत तरुणाचे नाव आहे.
शहरातील तुकाराम वाडी परिसरात सुरज उर्फ भाचा जोमाळकर हा तरुण शनिवारी सकाळी आपल्या मित्रांसोबत (एमएच १९ डीजे ७७७३) क्रमांकाच्या कारने जळगावहून सिहोरला जाण्यासाठी निघाले. शिरपुरमार्गे ते सिहोरला जात असतांना त्यांनी दुपारी बिजासनी मातेचे दर्शन घेतले आणि ते पुढच्या प्रवासाला लागले.
शिरपूरहून सेंधवामार्गे सिहोर जात असताना शनिवारी संध्याकाळी सेंधवा गावाजवळ त्यांच्या कारचे टायर फुटून ती पलटी झाली. अचानक झालेल्या अपघातात डोक्याला जबर मार लागल्याने सूरज जागीच मृत्यू झाला. याचा जागीच चालकासह इतर पाच जण गंभीर जखमी झाले आहेत. सूरजचे नातेवाईक रात्री उशिराने सेंधव्याकडे रवाना झाले. दरम्यान जखमींची नावे समजू शकलेली नाहीत. जखमींमधील दोघांची प्रकृती गंभीर असल्याने त्यांना इंदूर येथील रुग्णालयात दाखल करण्यात आले.
पोलीस होण्याचे स्वप्न राहिले अपुर्ण !
सूरजचे कुटुंबिय मूळचे जामनेर तालुक्यातील पहूर येथील आहे. कामानिमित्त ते जळगावात मामाकडे स्थायिक झाले असल्याने सुरजला सर्वजण भाचा म्हणून ओळत होते. कुटुंबाची परिस्थिती हालाखीची असल्याने एकुलत्या एक असलेल्या सुरजने पोलीस होण्याचे स्वप्न उराशी बाळगले होते. परंतु त्याचे स्वप्न पुर्ण होण्यापुर्वीच काळाने त्याला हिरावून घेतल्याने परिसरात हळहळ व्यक्त केली जात होती. त्याच्या पश्चात आई, वडील व एक बहिण असा परिवार आहे.
मित्रांसह परिसरातील नागरिकांना अश्रू अनावर !
अपघातात ठार झालेल्या सूरजचा स्वभाव मनमिळावू असल्याने त्याच्या मित्रांचा गोतावळा खूप होता. त्याचा मृतदेह घरी आणल्यानंतर त्याच्या कुटुंबियांनी एकच हंबरडा फोडत हृदय पिळवून टाकणारा आक्रोश केला. सुरज नेहमीच कोणाच्याही मदतीला धावून जात होता. काळाने झडप घालून त्यालाचा हिरावून घेतल्याने त्याच्या मित्रांसह परिसरातील नागरिकांना अश्रू अनावर झाले होते.
