नवी दिल्ली (वृत्तसंस्था) खिलाडी कुमार अर्थात अक्षय कुमारचा (Akshay Kumar) बहुचर्चित ‘पृथ्वीराज’ सिनेमा लवकरच प्रेक्षकांच्या भेटीला येणार आहे. हा सिनेमा येत्या 3 जूनला सिनेमागृहात प्रदर्शित होणार आहे. पण हा सिनेमा रिलीज होण्यापूर्वी केंद्रीय गृहमंत्री अमित शाह (Amit Shah) हा सिनेमा पाहणार आहेत. सिनेमा रिलीज होण्याच्या दोन दिवस आधी म्हणजेच 1 जूनला या सिनेमाचे दिल्लीत स्पेशल स्क्रीनिंग होणार आहे. या चित्रपटाचे दिग्दर्शक चंद्रप्रकाश द्विवेदी यांनी ही माहिती दिली.
दिग्दर्शक चंद्रप्रकाश द्विवेदी यांनी दिलेल्या माहितीनुसार, अमित शाह हे हा चित्रपट प्रदर्शित होण्यापूर्वी दोन दिवस आधी पाहणार आहे. “आपल्या देशाचे माननीय गृहमंत्री अमित शाह, भारतमातेच्या शूर पुत्रांपैकी एक, सम्राट पृथ्वीराज चौहान यांच्या गौरवशाली जीवनावरील महाकाव्याचे साक्षीदार होणे ही आमच्यासाठी सन्मानाची गोष्ट आहे. ज्या सम्राट पृथ्वीराज चौहान यांनी देशासाठी बलिदान दिले, त्यांची जीवनगाथा ते पाहणार आहेत. हा चित्रपट प्रदर्शित होण्याच्या दोन दिवस आधी म्हणजेच १ जून रोजी दिल्लीत या चित्रपटाचे स्पेशल स्क्रीनिंग केले जाणार आहे. या स्पेशल स्क्रीनिंगसाठी अमित शाह यांच्यासह काही कॅबिनेट मंत्री आणि दिग्गज नेते हजेरी लावणार आहेत.
पृथ्वीराज या चित्रपटात पृथ्वीराज चौहानच्या भूमिकेत अक्षय कुमार दिसत आहे. यात पृथ्वीराज चौहान यांनी शौर्याने युद्धे कशी जिंकली आणि दिल्लीची सुल्तानी कशी मिळवली हे दाखवण्यात आले आहे. या चित्रपटात पृथ्वीराज चौहान आणि मोहम्मद घोरी यांच्यातील लढाईचे दृश्यही पाहायला मिळत आहे. तसेच या चित्रपटाद्वारे २०१७ ची मिस वर्ल्ड मानुषी छिल्लर बॉलिवूडमध्ये पदार्पण करत आहे.
