भुसावळ (प्रतिनिधी) भुसावळ शहरातील नागरी समस्या सुटाव्यात, पंचशील नगरातील घरकुलांचा प्रश्न सुटावा यासह इतर न्याय मागण्यांसाठी सोमवारी सकाळी नऊ वाजता वंचित बहुजन आघाडीतर्फे भुसावळचे आमदार व भुसावळ नगराध्यक्ष रमण भोळे यांच्या कार्यालयासमोर निदर्शने देण्यात येवून आंदोलन करण्यात आले.
यावेळी शहरातील नागरी समस्या सुटाव्यात, पंचशील नगरातील रखडलेल्या घरकुलांचा प्रश्न मार्गी लावावा, शौचालय व पुल बांधण्यासाठी लोकप्रतिनिधींनी लक्ष द्यावे आदी मागण्यांसाठी वंचित बहुजन आघाडीतर्फे संविधानिक मार्गाने आंदोलन करण्यात आले. सोमवारी सकाळी नऊ वाजता जिल्हाध्यक्ष विनोद सोनवणे, जिल्हा महासचिव दिनेश इखारे, जिल्हा कोषाध्यक्ष अरुण नरवाडे, जिल्हा सदस्य अरुण तायडे, संगीता भामरे , गणेश जाधव यांच्या नेतृत्वात मोर्चा निघुन आमदार कार्यालयावर येवून धडकला.
शहराला अनिमित होणारा पाणीपुरवठा ,शहरातील वाढती गुन्हेगारी ,खराब रस्ते, घरकुल, आदी विषयासाठी बहुजन वंचित चे जिल्हाध्यक्ष विनोद सोनवणे यांच्या मार्गदर्शनाखाली हा मोर्चा काढण्यात आला यावेळी आमदार संजय सावकारे यांना निवेदन देण्यात आले. लोकप्रतिनिधींनी त्वरित विविध मागण्यांकडे जातीने लक्ष घालून दखल घेवून पाठपुरावा करावा अशी मागणी वंचितच्या वतीने करण्यात आली.
जिल्हाध्यक्ष विनोद सोनवणे, जिल्हा महासचिव दिनेश इखारे, जिल्हा कोषाध्यक्ष अरुण नरवाडे, जिल्हा सदस्य अरुण तायडे, संगीता भामरे, गणेश जाधव आदीं पदाधिकारी व कार्यकर्ते उपस्थित होते .
भुसावळ शहरातील वाढती गुन्हेगारी ही वस्तुस्थिती – आ. संजय सावकारे
आमदार संजय सावकारे म्हणाले की शहरातील वाढती गुन्हेगारी ही सध्याची वस्तुस्थिती आहे. मी याविषयी विधानसभेमध्ये लक्षवेधी ही मांडली होती. वेळोवेळी मी याचा पाठपुरावा करत आहे लवकरच विविध समस्यांचा उपायोजना करण्यात येतील असेही आमदार संजय सावकारे म्हणाले.