औरंगाबाद (वृत्तसंस्था) एका युवतीचं एका तरुणावर प्रेम जडलं. तरुणीने आपलं प्रेम व्यक्त करत लग्नाचा प्रस्ताव त्याच्यासमोर ठेवला. मात्र तरुणाने लग्नास नकार दिला. यामुळे नाराज तरुणीने घरी येऊन विषारी पदार्थ खाल्ला. या तरुणीच्या पाच मैत्रिणींनी तरुणीची ही अवस्था पाहून त्यांनीही विष प्राशन केलं. या घटनेत तीन तरुणींचा मृत्यू झाला.
एसपी कांतेश कुमार मिश्रा यांनी दिलेल्या माहितीनुसार संबंधित तरुणीला तिच्या भावाचा मेहुणा म्हणजेच बहिनीचा भाऊ आवडत होता. त्याला प्रपोज करण्यासाठी ती आपल्या पाच मैत्रिणींना सोबत घेऊन गेली. मैत्रिणींसमोरच तिने आपल्या मनातील भावना व्यक्त केल्या. आपल्याशी लग्न करण्याचा प्रस्तावही तिने तरुणासमोर मांडला. प्रियकराने मात्र तरुणीशी लग्न करण्यास साफ नकार दिला आणि तो निघून गेला. नकार ऐकून हिरमुसलेल्या सहा जणी गावी परत आल्या. नाराज झालेल्या प्रेयसीने आधी विष प्यायले. आपल्या मैत्रिणीने टोकाचं पाऊल उचलल्याचं पाहून उर्वरित पाच जणींनीही तिची साथ देण्याचा निर्णय घेतला. त्यानंतर एका मागून एक पाचही मैत्रिणींनी विषप्राशन केले.
तिघी जणींचा मृत्यू
मैत्रिणींनी विष प्यायल्याचा प्रकार काही वेळातच गावकऱ्यांपर्यंत पोहोचला. त्यांनी तातडीने सहाही जणींना जवळच्या रुग्णालयात नेले, परंतु त्यापैकी तिघी जणींनी अखेरचा श्वास घेतला होता. त्यानंतर गंभीर अवस्थेत असलेल्या इतर तिधींना लगेचच मगध मेडिकल कॉलेजमध्ये दाखल करण्यात आले. तिथे त्यांच्यावर उपचार सुरु आहेत. घटनेची माहिती मिळताच सीओ अवधेश कुमार सिंह, ठाणाध्यक्ष राजगृह प्रसाद घटनास्थळी पोहोचले आणि त्यांनी आढावा घेतला. गावात एकाच वेळी तिथी जणींच्या मृत्यूने खळबळ उडाली आहे. त्यांच्या नातेवाईकांची रडून रडून वाईट अवस्था झाली आहे. पोलिसांनी तिथीचे मृतदेह शवविच्छेदनासाठी पाठवले असून पुढील तपास सुरु आहे.
