यावल (प्रतिनिधी) डांभुर्णी येथील केळी उत्पादकाची फसवणूक करण्याचा प्रयत्न उघड झाल्यानंतर बाजार समितीने धरणगावच्या व्यापाऱ्यास २१ हजारांचा दंड आकारला. तसेच फरकातील ९ हजार रुपये देण्याचे आदेश देत व्यापाऱ्याकडून माफीनामा देखील लिहून घेतला.
डांभुर्णी, ता. यावल येथील केळी उत्पादक शेतकरी पुरुजित चौधरी यांनी धरणगाव येथील जावेद रहीम बागवान या व्यापाऱ्यासोबत केळी बागेतील दुय्यम प्रतीच्या केळीचे घड कापण्याबाबतचा करार केला होता. मात्र, व्यापाऱ्याने उच्च प्रतीचे केळीचे घड कापले. फसवणुकीचा प्रकार लक्षात येताच शेतकरी चौधरी यांनी तत्काळ बाजार समितीकडे तक्रार केली.
बाजार समितीने या तक्रारीची दखल घेत निरीक्षकांना घटनास्थळाची पाहणी करण्यासाठी पाठविले. त्यावेळी तक्रारीत तथ्य आढळून आले. निरीक्षकाने सभापती हर्षल पाटील संचालक राकेश फेगडे, उज्जैनसिंग राजपूत बाजार समितीचे सचिव स्वप्निल सोनवणे यांच्या समक्ष पंचनामा केला. यानंतर सभापती व संचालक मंडळाने व्यापाऱ्याला २१ हजार रुपये दंड आकाराला. तसेच कायदेशीर कारवाई टाळण्यासाठी व्यापाऱ्याने फरकाच्या रकमेतील नऊ हजार रुपये व २१ हजार रुपये दंडाची रक्कम भरण्याचे मान्य केले आणि बाजार समितीला माफीनामा लिहून दिला. याबाबतचे वृत्त आज लोकमतने दिले आहे.
