चंद्रपूर (वृत्तसंस्था) येथील घुग्घुस अमराई वॉर्डमध्ये २६ ऑगस्ट, २०२२ रोजी एक घर अचानक १०० फूट खोल खड्यात गडप झाल्यामुळे एकच खळबळ उडाली होती. नेमकं काय झालं?, हे गावाकऱ्यांना कळायच्या आत हे घर १०० फूट खोल जमिनीखाली पडले. दरम्यान, तहसीलदार आणि इतर अधिकाऱ्यांनी घटनास्थळी दाखल होत परिस्थितीचा आढावा घेतला.
घर जमिनीत पाडण्याची घटना घडली त्या दिवशी गावकरी एक सण साजरा करत होते. त्याचवेळी गजानन मडावी या व्यक्तीचे घर अचानक हलू लागले. त्यामुळे घरातील सर्व सदस्य धावत घराबाहेर आले. सुरूवातीला जमिनीत भूस्खलन झाल्याने घर जमिनीच्या थोडे आत गेल्याचे तिथल्या व्यक्तींना जाणवले. पण बघता बघता तिथे मोठा खड्डा तयार झाला आणि घर त्यात १०० फूट खाली पडले. भूस्खलन झाल्याचे स्पष्ट होताच परिसरातील वीजपुरवठा बंद करण्यात आला. अधिक माहिती मिळवण्यासाठी डब्ल्यूसीएलच्या वरिष्ठ अधिकाऱ्यांनी तेथील परिसराचा नकाशा तपासला. अनेक दशकांपूर्वी घुग्घुस कॉम्प्लेक्समध्ये रॉबर्टसन इनलाइन खाण होती अशी माहिती समोर आली आहे. नकोडा ते घुग्घुस, नायगावपर्यंत ३ खाणी होत्या. नकोडाची तिसऱ्या क्रमांकाची खाण १९९५ साली बंद करण्यात आली. या खाणीची व्याप्ती नकोडा ते घुग्घुसमार्गे नायगावपर्यंत विस्तारलेली होती. त्यावरच हे गाव वसले आहे. अशा परिस्थितीत ही घटना त्या खाणीशी संबंधित असल्याचे बोलले जात आहे.
