जळगाव (प्रतिनिधी) वर्षभरापूर्वी दिलेला मोबाईल परत मागत दुचाकी आणि मोबाईल हिसकावून इक तरुणाला मारहाण केल्याप्रकरणी तिघांविरोधात गुन्हा दाखल झाला आहे.
पृथ्वी राजकुमार चंदनानी (वय-२५, रा. चंदूलाल रसवंती जवळ, गणेश कॉलनी) हे २४ ऑक्टोबर रोजी मध्यरात्री १ वाजता नवदुर्गा मित्रमंडळ सिंधी कॉलनी येथे भाविकांसाठी प्रसाद बनविण्याचे काम करत होते. पहाटे ३.४५ वाजेच्या सुमारास ते सिंधी कॉलनी मंदीरासमोरील हॉटेलजवळ चहा पिण्यासाठी गेले. यावेळी तेथे सौरभ जैसवाल हा आला आणि तुला गेल्या वर्षी वापरण्यासाठी मोबाईल दिला होता, तो मला परत कर म्हणाला. मात्र मी कोणताही मोबाईल घेतला नाही, असे सांगितल्यानंतर सौरभसह अनोळखी दोन ते तीन जणांनी पृथ्वीला मारहाण करण्यास सुरूवात केली. तसेच त्याच्या ताब्यातील दुचाकी आणि मोबाईल असा एकुण ६० हजार रूपये किंमतीचा मुद्देमाल बळजबरी हिसकावून घेतला. दरम्यान, याप्रकरणी जिल्हापेठ पोलीस ठाण्यात सौरभसह इतर दोघांवर गुन्हा नोंदविण्यात आला असून पुढील तपास पो.हे.कॉ. मनोज पवार करीत आहे.
