जळगाव (प्रतिनिधी) बीएचआर घोटाळ्यातील संशयित आरोपी सुरज झंवरच्या पुण्याच्या फ्लॅटमध्ये सापडलेले आ. राजूमामा भोळे यांचे लेटरहेड बनावट असल्याचा दावा आज भाजपा विधानसभा क्षेत्र प्रमुख दीपक साखरे यांनी केला. श्री. साखरे यांचा दावा खरा असेल तर विधीमंडळ सदस्याचे बनावट लेटरहेड बनविण्या सारख्या गंभीर प्रकरणी खुलाशाऐवजी पोलिसात तक्रार का नाही?, असा प्रश्न उपस्थित केला जात आहे. विशेष म्हणजे बनावट लेटरहेडचा दुरुपयोग झाल्याचे आढळल्यास याबाबत माहिती असूनही तुम्ही पोलिसात तक्रार का दिली नव्हती?, हा प्रश्न भविष्यात आ. भोळे यांना अडचणीत आणणारा ठरू शकतो.
बीएचआर घोटाळ्यातील संशयित आरोपी सुरज झंवरच्या कार्यालयात सापडलेले आ. राजूमामा भोळे यांचे कोरे लेटरहेड सापडल्यानंतर प्रचंड खळबळ उडाली होती. धक्कादायक आमदार गिरीश महाजनांपाठोपाठ आता सुरेश भोळे यांचेही लेटरपॅड झंवरच्या कार्यालयात आढळून आल्यामुळे चर्चेला अधिक उधान आले आहे. सुरज झंवर याच्या पुण्यातील फ्लॅटमध्ये आठ पिशव्यांमध्ये शेकडो कागदपत्र मिळाले होते. यात जळगावचे आमदार सुरेश भोळे यांच्या नावाचे कोरे लेटरपॅडचा देखील समावेश आहे. याच बाबत आज भाजपा विधानसभा क्षेत्र प्रमुख दीपक साखरे यांनी खुलासा देत म्हटले होते की, जिथे सरकारी शिक्के बनावट बनू शकतात त्या ठिकाणी आमदारांचे बनावट लेटर पॅड बनवणे सहज शक्य आहे. तसेच बीएचआर प्रकरणाशी आ. भोळे यांचा कोणत्याही प्रकारे संबंध नाही. आ. भोळे हे बीएचआर पतपेढीचे ठेवीदार व कर्जदार सुद्धा नाहीत. बीएचआर प्रकरणाचा आ. राजूमामा भोळे यांच्याशी संबंध जोडणे म्हणजे सुता वरून स्वर्ग गाठण्यासारखे असल्याचेही श्री. साखरे यांनी म्हटले आहे.
राजूमामा भोळे यांचे लेटरहेड प्रकरणी दीपक साखरे यांनी खुलासा दिल्यानंतर काही प्रश्न उपस्थीत केले जात आहेत. झंवरच्या कार्यालयात सापडलेले आ. राजूमामा भोळे यांचे कोरे लेटरहेड हे जर बनावट आहेत. तर मग खुलासा देण्यापेक्षा सरळ झंवरविरुद्ध पोलिसात तक्रार का दिली गेली नाही?. कारण राज्याच्या विधिमंडळ सदस्याचे बनावट लेटरहेड बनवून झंवरने त्याचा नेमका कुठं-कुठं दुरुपयोग केला?. याची चौकशी होणे अत्यंत गरजचे आहे. अशा पद्धतीने एका लोकप्रतिनिधीचे बनावट लेटरहेड बनविणे गंभीर बाब असल्यामुळे खुलासा देण्याऐवजी तक्रार अत्यावश्यक ठरते. बनावट लेटरहेडचा कुठं दुरुउपयोग झाल्याचे आढळल्यास याबाबत माहिती असूनही तुम्ही तक्रार का दिली नव्हती?, हा प्रश्न भविष्यात आ. भोळे यांना अडचणीत आणणारा ठरू शकतो.
बनावट दस्तऐवज म्हणजे काय?
बनावट म्हणजे जे खरे दस्त आहे, त्या दस्तात कुठेतरी छेडछाड करणे किंवा एखादे दस्त नव्याने अशा प्रकारे बनवणे की जे खरे दस्त आहे, त्यासारखे भासेल. आणि त्या बनावट दस्ताचा खऱ्या दस्ताशी काहीही संबंध नसेल.
काय म्हणतो कायदा?
बनावट दस्तऐवजाचा फसवेगिरीसाठी उपयोग व्हावा, या हेतूने बनावट दस्तऐवज तयार करणे, हा गंभीर स्वरूपाचा गुन्हा आहे. दुसऱ्याची बेअब्रू करण्यासाठी खोटा दस्तऐवज तयार करणे, तो जवळ बाळगणे किंवा बनावटगिरीने तो उपयोगात आणणे अशासारख्या इतरही गंभीर गुन्ह्यांत २ वर्षापासून तर जन्मठेपसह वेगवेगळ्या कलमाला वेगवेगळी शिक्षा आहे. भारतीय दंडसंहितेत ४६३ ते ४७७ ए या कलमांखाली बनावट दस्तऐवजांसंबंधीची कायदेशीर तरतूद आहे.
