जळगाव (प्रतिनिधी) बीएचआर घोटाळ्यातील तब्बल २२ते २३ साक्षीदारांचे जबाब आज आर्थिक गुन्हे शाखेच्या पथकाने नोंदवले. पुढील काही दिवस साक्षीदारांचे जबाब नोंदविण्याचे काम सुरूच राहणार आहे.
बीएचआर घोटाळ्यातील साक्षीदारांचे जाब जबाब नोंदविण्यासाठी पुणे आर्थिक गुन्हे शाखेचे पथक काल सायंकाळी जळगावात येऊन धडकले होते. या पथकात पोलीस निरीक्षक श्री.भोसले यांच्यासह इतर तीन कर्मचाऱ्यांचा समावेश आहे. बीएचआर घोटाळ्यातील काही प्रमुख साक्षीदारांचे जबाब नोंदविण्यासाठी हे पथक जळगावात आले आहे. त्यानुसार आज सकाळपासूनच जबाब नोंदविण्याच्या कामाला सुरुवात झाली. आज सायंकाळपर्यंत तब्बल २२ ते २३ साक्षीदारांचे जबाब नोंदवून झाले होते. पुढील काही दिवसात औरंगाबाद सोयगाव, धुळे, धरणगाव-पाळधी, अमळनेर, जामनेर, जळगाव यासह इतर ठिकाणच्या साक्षीदारांचे जबाब नोंदविण्यात येणार असल्याचे कळते.
पुणे आर्थिक गुन्हे शाखेचे पथक नेमकं कुणाचे आणि एकूण किती जणांचे जबाब घेणार आहे?, याबाबत अजून स्पष्ट माहिती मिळू शकली नसली, तरी शंभरहून अधिक साक्षीदारांचे जबाब नोंदविण्यात येणार असल्याचे कळते.
दुसरीकडे मुख्य संशयित सुनील झंवर याच्या जामीन अर्जावर पुणे न्यायालयात सुनावणी सुरू आहे. बचाव पक्ष आणि सरकारी पक्षाने आपापली बाजू मांडली असून न्यायालयाच्या निर्णयाकडे सर्वांचे लक्ष लागून आहे.
