जळगाव (प्रतिनिधी) देशभरातील विमानांना बॉम्बने उडवून देण्याच्या धमक्या दिल्या जात असल्याने विमान कंपनी व प्रवाशांमध्ये भीतीचे वातावरण असतानाच अहमदाबादहून जळगावला येणाऱ्या विमानालाही मंगळवारी रात्री नऊ वाजता धमकीचा संदेश मिळाल्याने एअरपोर्ट अॅथोरिटी व पोलिस प्रशासनाची चांगलीच धावपळ उडाली होती.
मंगळवारी जळगावहून अलायन्स एअरची अहमदाबाद-जळगाव सेवेचा पहिल्याच दिवस होता. पहिल्याच दिवशी अहमदाबाद येथून जळगावला साडेआठ वाजता येणाऱ्या विमानात बॉम्ब असल्याचा संदेश अलायन्स एअर कंपनीच्या एक्स या सोशल मिडिया अकाऊंट मिळाला होता. त्यानुसार त्यांनी जळगाव एअरपोर्ट अॅथोरिटी तत्काळ माहिती दिली. त्यानंतर एअरपोर्ट अॅथोरिटीने पोलिसांना कळविले. पोलिसांचे पथक तत्काळ विमानतळावर पोहचले. त्यांनी विमानात बॉम्बशोध व श्वान पथकालाही यावेळी पाचारण केले. बॉम्बशोधक पथकाने केलेल्या तपासणीत काहीही आढळून न आल्याने सर्वांनीच सुटकेचा निःश्वास सोडला.
