जयपूर (प्रतिनिधी) राजस्थानचे मुख्यमंत्री अशोक गहलोत हे काँग्रेस अध्यक्षपदाच्या शर्यतीत उतरणार असल्याचे समोर येत आहे. गेहलोत यांना पाठिंबा देणाऱ्या 92 आमदारांनी सामूहिक राजीनामे दिल्याचे वृत्त समोर आल्यानंतर प्रचंड खळबळ उडाली आहे.
राजस्थानमध्ये मुख्यमंत्रीपदासाठी जोरदार रस्सीखेच सुरू आहे. काँग्रेस आमदारांची सायंकाळी 7 वाजता होणारी बैठक आता रद्द करण्यात आली आहे. तर दुसरीकडे गेहलोत यांना पाठिंबा देणाऱ्या 92 आमदारांनी सामूहिक राजीनामे दिल्याचे वृत्त समोर आले आहे. मुख्यमंत्री गेहलोत यांच्या निवासस्थानी होणाऱ्या बैठकीला काँग्रेस अध्यक्षांनी काँग्रेस नेते मल्लिकार्जुन खरगे आणि अजय माकन यांना निरीक्षक आणि प्रभारी म्हणून पाठवलं आहे. मुख्यमंत्री अशोक गेहलोत यांच्यासह दोन्ही निरीक्षक हॉटेलमधून मुख्यमंत्र्यांच्या निवासस्थानी रवाना झाले आहेत. विधीमंडळ पक्षाची बैठक काही वेळात सुरू होऊ शकते. माजी उपमुख्यमंत्री सचिन पायलट यांच्यासह २५ आमदारही मुख्यमंत्र्यांच्या निवासस्थानी उपस्थित आहेत. गेहलोत गटाचे सर्व आमदार विधानसभा अध्यक्ष सीपी जोशी यांच्या घरी जाऊ शकतात. गेहलोत समर्थक आमदार सामूहिक राजीनामा देणार असल्याची चर्चा आहे. सुमारे ८० आमदारांनी त्यांचे राजीनामे लिहिले असून ते सर्व सभापतींच्या घरी नेण्यात येणार असल्याची माहिती मिळत आहे.
काँग्रेस विधायक दलाची बैठक संध्याकाळी 7 वाजता सुरू होणार होती, पण 8.30 वाजेपर्यंत या बैठकीला सुरूवात झाली नाही. काँग्रेस आमदारांची एक वेगळी बैठक आमदार आणि मंत्री शांती धारीवाल यांच्या घरी सुरू आहे. अशोक गहलोत यांनी पुढच्या महिन्यात होणाऱ्या काँग्रेस अध्यक्षपदाच्या निवडणुकीत मैदानात उतरण्याची घोषणा केली आहे. अशोक गहलोत यांनी ही निवडणूक लढण्याचा निर्णय घेतल्यामुळे राजस्थानमध्ये मुख्यमंत्री बदलला जाण्याची शक्यता आहे.
