जळगाव (प्रतिनिधी) शहरातील उस्मानिया पार्कमध्ये अज्ञात चोरट्यांनी बंद घर फोडत साधारण १५ हजाराचा ऐवज लंपास केल्याची घटना उघडकीस आली आहे. यासंदर्भात अज्ञात चोरट्यांविरुद्ध शहर पोलीस स्थानकात गुन्हा दाखल करण्यात आलाय.
यासंदर्भात अधिक असे की, उस्मानिया पार्कमध्ये राहणारे इम्तियाज हुकोमोद्दिन शेख हे आपल्या सालीच्या मुलाच्या लग्नासाठी २२ नोव्हेंबर पासून मास्टर कॉलनी येथे सहपरिवार गेले होते. परंतु आज सकाळी आठ वाजेच्या सुमारास त्यांना त्यांचे शेजारी सामशोद्दिन शेख यांनी फोन करून सांगितले की, तुमच्या घराचा दरवाजा उघडा असून कुलूप तुटलेले आहे. शेख हे तातडीने घरी पोहोचले आणि त्यानंतर घरात गेल्यानंतर त्यांना लक्षात आले की, अज्ञात चोरट्यांनी किचनमध्ये स्टीलच्या चौकोनी डब्यात ठेवलेले पगाराचे सात हजार रुपये रोख तसेच हॉलमधील एलजी कंपनीचा २२ इंची एलईडी टीव्ही तसेच सॅमसंग कंपनीचा मोबाइल व एक ग्रॅम वजनाचा गळ्यातील मिक्स सोन्याचा हार लंपास केला आहे. यासंदर्भात आज शहर पोलीस स्थानकात अज्ञात चोरट्याविरुद्ध गुन्हा दाखल करण्यात आला आहे.
