चाळीसगाव (प्रतिनिधी) – तालुक्यातील पिंपळगाव येथे घरफोडी करून ६ हजार रुपयांची रोकड चोरल्याची घटना ९ जुलैला सकाळी उघडकीस आली. विशेष म्हणजे, संशयिताला ग्रामस्थांनी घटनास्थळावरून पकडून चाळीसगाव ग्रामीण पोलिसांच्या ताब्यात दिले आहे. पिंपळगाव येथील शेतकरी अशोक खंडेराव देशमुख (वय ६५) हे पत्नी व सुनबाईसह नातेवाईकांच्या लग्नासाठी संगमनेर येथे गेले होते. त्यावेळी घराला कुलूप लावले होते. दरम्यान, देशमुख यांच्या भावाने घरातून एक अनोळखी व्यक्तीला बाहेर येताना पाहिले. यानंतर ग्रामस्थांच्या मदतीने त्याला पकडण्यात आले. चौकशीत त्याने आपले नाव प्रवीण सुभाष पाटील (रा. बिलवाडी, ता. जि. जळगाव) असे सांगितले. त्यानंतर त्याला पोलिसांच्या ताब्यात देण्यात आले. तर, देशमुख कुटुंब घरी परतल्यानंतर घराचे कुलूप तुटलेले व कपाट उघडे असल्याचे निदर्शनास आले. कपाटातील ड्रॉवरमध्ये ठेवलेली ६ हजार रुपयांची रोकड (५०० रुपयांच्या १२ नोटा) चोरीस गेल्याचे स्पष्ट झाले. याप्रकरणी अशोक देशमुख यांच्या फिर्यादीवरून चाळीसगाव ग्रामीण पोलिस ठाण्यात प्रवीण पाटील याच्याविरुद्ध घरफोडी व चोरीचा गुन्हा दाखल करण्यात आला आहे. तपास चाळीसगाव ग्रामीण पोलीस करत आहेत.
