नाशिक (वृत्तसंस्था) देशातील सर्वोत्कृष्ट सुरक्षा व्यवस्था असलेल्या नाशिक करन्सी नोट प्रेसमधून ५ लाख रुपयांच्या नोटा गायब झाल्याची खळबळजनक घटना समोर आली आहे. याप्रकरणी अद्याप कोणताही गुन्हा दाखल करण्यात आला नाही. एवढी सुरक्षा व्यवस्था असूनही पाच लाख रुपयांचा हिशोब लागत नसल्यानं हे पैसे नेमके कुठे गेले असा प्रश्न प्रशासनाला पडला आहे.
दोन आठवड्यापूर्वी ही घटना उघड झाली होती. कडेकोट सुरक्षाव्यवस्था असतानाही पाच लाख रुपये कुठे गेले? याबाबत प्रश्नचिन्ह उपस्थित होत आहे. या प्रकरणी अद्याप कोणताही गुन्हा दाखल करण्यात आला नाहीये. गुन्ह्याची नोंद करण्यासाठी नोट प्रेसमधील अधिकाऱ्यांची मध्यरात्रीपर्यंत धावपळ सुरु होती. मात्र, अद्याप गुन्ह्याची नोंद करण्यात आली नाहीये. नोट प्रेसमधून पाच लाखांच्या नोटा गायब होण्यामागे घातपात किंवा मोठा घोटाळा असल्याची भीती व्यक्त होत आहे. ५०० रुपयांच्या नोटांचे १० बंडल गायब झाल्याची माहिती सध्या समोर येत आहे. करन्सी नोट प्रशासन या प्रकाराची गोपनीय चौकशी केली आहे. प्रेस नोट प्रशासनानं अंतर्गत चौकशी करुनही पाच लाखांचा तपास लागला नसल्याची माहिती समोर येत आहे.
छपाईच्या कारखान्यातून चलनी नोटा गायब झाल्यानं मागील काही काळापासून गोपनीयरीत्या विभागीय चौकशी सुरू होती. पण सोमवारी मुद्रणालयातील अधिकारी उपनगर पोलीस ठाण्यात पोहोचले तेव्हा हे प्रकरण उघडकीस आलं आहे. याप्रकरणी रात्री उशीरापर्यंत पोलिसांत गुन्हा दाखल झालेला नाही.
