जळगाव (प्रतिनिधी) मुंबई सायबर पोलीस असल्याची बतावणी करून इंटरपोल, सीबीआय आणि सुप्रीम कोर्टाची बनावट नोटीस टाकून जळगाव शहरातील एका महिला अधिकारीला तब्बल २५ लाखांत सायबर ठगांनी गंडवल्याची खळबळजनक घटना उघडकीस आली आहे. या प्रकरणी जळगाव सायबर पोलिसात गुन्हा दाखल करण्यात आला आहे.
प्रविणकुमार, के सी सुब्रमन्यम, प्रदिप सांवत्, आणि संदिप राव असे नाव सांगणारे अनोळखी सायबर ठगांनी जळगावातील एका महिला अधिकारीला वेळोवेळी व्हाटसअपवरुन व्हॉइस कॉल तसेच व्हिडिओ व नॉर्मल कॉल आणि मेसेज करुन तुमच्या खात्यावरून कोट्यवधीचे व्यवहार झाल्याचे सांगून बनावटी सुप्रिम कोर्ट नोटीस तसेच इंटरपोलच्या नावाची रेड नोटीस तसेच गोपनीयता कायम ठेवण्यासाठी सीबीआयची नावाची नोटीस, असे सगळे बनावटी कागदपत्र व्हाटसअपद्वारे पाठवून महिलेला अटक करण्याची भीती दाखवली. तसेच जीवे ठार मारण्याची धमकी देत महिलेला सगळ्या केस मधुन बाहेर पडण्याचे खोटे आश्वासन देत इन्सपेक्शन फीच्या नावाखाली २५ लाख रुपये एका बँक खात्यात टाकायला सांगितले. तब्बल दहा दिवस संबंधित महिलेला डिजिटल अरेस्ट ठेवण्यात आले. अखेर भेदरलेल्या महिलेने यवतमाळ येथे जात पैशांची व्यवस्था केली आणि सायबर ठगांनी सांगितलेल्या खायावर पैसे जमा केले. शेवटी आपली फसवणूक झाल्याचे लक्षात आल्यावर ५२ वर्षीय नौकरदार महिलेने या प्रकरणी जळगाव सायबर पोलिसात प्रविणकुमार, के सी सुब्रमन्यम, प्रदिप सांवत्, आणि संदिप राव असे नाव सांगणाऱ्या व्यक्तींविरुद्ध गुन्हा दाखल केला आहे. पुढील तपास जळगाव सायबर पोलीस करीत आहेत.
