बोदवड (प्रतिनिधी) बोदवड कृषी उत्पन्न बाजार समितीचे हमाल मापाडी मतदारसंघात निवडून आलेले संचालक मनूर बु ।। चे रहिवासी गोपाळ माळी यांनी गावात अंत्यसंस्कार करण्यासाठी उपयोगात येणारी स्टील तिरडी नुकतीच भेट दिली.
गोपाळ माळी हे अल्पभूधारक शेतकरी असून स्वतः हमाली करून उदरनिर्वाह करतात. संचालक पदाचा मासिक मीटिंगचा भत्ता व स्वतः हमालीतून मिळालेल्या पैशातून आपल्या मनुर बु. गावासाठी त्यांनी स्टीलची तिरडी घेऊन दिली आहे.
याआधीही त्यांनी पहिला मासिक भत्ता व बैठक भत्त्यातून एका गरजू वृद्ध महिलेस मदत केली होती. गावात विठ्ठल मंदिर चौकात गावकऱ्यांना ही तिरडी सुपूर्त करण्यात आली. यावेळी भोले महाकाल फाउंडेशनचे संस्थापक अध्यक्ष अनिल गगतिरे,गजानन खोडके, उपेंद्र इंगळे, तुषार उगले व गावकरी उपस्थित होते. गोपाळ माळी यांच्या या उपक्रमाचे गावकऱ्यांकडून कौतुक होत आहे.
